ڈپٹی چیف منسٹر ملّو بھٹی وکرمارکا، وزیر پونم پربھاکر، اور حکومت کے مشیر محمد علی شبیر نے ریاست بھر میں دعوتِ افطار اور عید الفطر کی تقریبات کے لیے اعلیٰ معیار کے انتظامات کو یقینی بنانے کی ہدایت دی ہے۔ اس سلسلے میں ہفتہ کے روز اسمبلی میٹنگ ہال میں ایک اعلیٰ سطحی اجلاس منعقد ہوا، جس میں تیاریوں کا جائزہ لیا گیا اور حتمی شکل دی گئی۔
اجلاس میں 25 مارچ کو ایل بی اسٹیڈیم، حیدرآباد میں چیف منسٹر اے. ریونت ریڈی کی میزبانی میں ہونے والی دعوتِ افطار اور رمضان کے دیگر انتظامات پر تبادلہ خیال کیا گیا۔ اس میں تمام متعلقہ محکموں کے افسران نے شرکت کی۔ ہائی پاور کمیٹی کے چیئرمین، ڈپٹی چیف منسٹر بھٹی وکرمارکا نے کہا کہ یہ ایک باوقار اور جذباتی موقع ہے، جو ریاستی حکومت کے مذہبی رواداری اور روایات کے احترام کے عزم کی عکاسی کرتا ہے۔
انہوں نے واضح کیا کہ افطار اور رمضان سے متعلق انتظامات کے لیے فنڈز کی کوئی کمی نہیں ہوگی۔ تمام محکمے کھانے، مہمان نوازی، صفائی، اور پروٹوکول کے اعلیٰ معیار کو یقینی بنائیں۔ کسی بھی قسم کی کوتاہی برداشت نہیں کی جائے گی
، اور امن و امان، برقی کی بلاتعطل فراہمی، صفائی، اور محفوظ پینے کے پانی کی دستیابی کو ہر حال میں یقینی بنایا جائے۔ انہوں نے عہدیداروں کو ہدایت دی کہ کسی بھی مسئلے پر تاخیر کیے بغیر براہ راست ان سے یا ضلع انچارج وزیر پونم پربھاکر سے رابطہ کریں۔
وزیر پونم پربھاکر نے بھی ڈپٹی چیف منسٹر کی ہدایات کی توثیق کرتے ہوئے عہدیداروں سے کہا کہ وہ اخلاص اور باریکیوں پر توجہ کے ساتھ منصوبوں پر عمل کریں۔ انہوں نے کہا کہ دعوتِ افطار کے علاوہ رمضان کے باقی دنوں اور عید الفطر کے لیے بھی خصوصی انتظامات ضروری ہیں۔
اجلاس کے دوران جب بھٹی وکرمارکا اور پونم پربھاکر اسمبلی اجلاس میں شرکت کے لیے روانہ ہوئے تو حکومت مشیر محمد علی شبیر نے اجلاس کی صدارت سنبھالی اور مزید ہدایات جاری کیں۔ بطور نائب چیئرمین ہائی پاور کمیٹی، انہیں روزانہ کی بنیاد پر نگرانی اور انتظامات کی نگرانی کی ذمہ داری دی گئی ہے۔
محمد علی شبیر نے پچھلے 20 دنوں کے دوران پینے کے پانی کی بلاتعطل فراہمی، برقی، کچرے کی صفائی، اور امن و امان کو برقرار رکھنے پر عہدیداروں کی تعریف کی اور انہیں عید الفطر تک اسی محنت اور نگرانی کو برقرار رکھنے کی ہدایت دی۔ انہوں نے ریاست بھر میں بڑی مساجد اور عیدگاہوں میں عید کی نماز کے خصوصی انتظامات پر بھی زور دیا۔
انہوں نے ڈپٹی چیف منسٹر بھٹی وکرمارکا کا 815 مساجد میں افطار کے لیے 8.15 کروڑ روپے اور آئمہ و مؤذنین کی تین ماہ کی تنخواہوں کے لیے 23 کروڑ روپے جاری کرنے پر شکریہ ادا کیا۔ انہوں نے درخواست کی کہ یہ تنخواہیں گرین چینل سسٹم کے ذریعے بروقت جاری کی جائیں تاکہ مستقبل میں کوئی تاخیر نہ ہو۔
محمد علی شبیر نے مختلف محکموں کے درمیان تعاون کی بھی تعریف کی اور اس بات پر زور دیا کہ بین المحکمہ جاتی رابطہ مضبوط ہونا چاہیے تاکہ کسی بھی طرح کی کوتاہی سے بچا جا سکے۔ انہوں نے کہا کہ چیف منسٹر کی میزبانی میں ہونے والی دعوتِ افطار ایک باوقار اور جذباتی تقریب ہوگی،
تمام متعلقہ محکموں کو ہائی پاور کمیٹی کی جانب سے جاری کردہ رہنما اصولوں پر عمل کرنے کی ہدایت دی گئی ہے۔ تمام انتظامات کی باقاعدہ نگرانی، رابطہ کاری، اور بروقت عمل درآمد نائب چیئرمین محمد علی شبیر کی براہ راست نگرانی میں ہوگا، تاکہ دعوتِ افطار اور عید الفطر کی تقریبات شاندار اور وقار کے ساتھ منعقد ہوں۔
اجلاس میں وقف بورڈ چیئرمین سید عظمت اللہ حسینی ؛ حج کمیٹی کے چیئرمین خسرو بیابانی ؛ اقلیتی مالیاتی کارپوریشن کے چیئرمین عبیداللہ کوتوال ؛ اور دوسرے موجود تھے
