’رازداری پر براہ راست حملہ‘، کانگریس نے مودی حکومت کے نئے انکم ٹیکس قانون پر کیا تشویش کا اظہار

حال ہی میں مرکز کی مودی حکومت کے ذریعہ پیش کیے گئے نئے انکم ٹیکس بل کو لے کر ہنگامہ برپا ہو گیا ہے۔ حکومت کی طرف سے دعویٰ کیا جا رہا ہے کہ نئے ٹیکس بل میں کئی بڑی تبدیلیاں کی گئی ہیں تاکہ قوانین کو مزید آسان اور سہل بنایا جا سکے۔ حالانکہ نئے بل میں کچھ ایسے اصول موجود ہیں جن پر لوگوں نے سخت ناراضگی کا اظہار کیا ہے۔ کانگریس نے بھی اس تعلق سے اپنا سخت رد عمل ظاہر کیا ہے اور تشویش کا اظہار کرتے ہوئے کہا ہے کہ ’’مودی حکومت کا نیا انکم ٹیکس قانون رازداری پر براہ راست حملہ ہے۔‘‘

کانگریس نے نئے انکم ٹیکس قانون سے متعلق سامنے آ رہیں میڈیا رپورٹس کا حوالہ دیتے ہوئے اپنے آفیشیل ’ایکس‘ ہینڈل پر کچھ ویڈیوز پوسٹ کی ہیں۔ ایک ویڈیو پیغام کانگریس ترجمان سپریا شرینیت کا ہے جو مودی حکومت پر حملہ آور رخ اختیار کرتے ہوئے کہتی ہیں کہ ’’انہوں نے پیگاسس کے ذریعہ ہماری جاسوسی کی۔ اب وہ ہماری ذاتی زندگی کو پوری طرح سے چھین لیں گے۔ مودی کے نئے انکم ٹیکس قانون کے تحت حکومت خاموشی سے ٹیکس حکام کو آپ کی ڈیجیٹل زندگی میں داخل ہونے کا اختیار دے رہی ہے۔ کوئی وارنٹ، کوئی نوٹس نہیں، یہ قانون صرف شبہ کی بنیاد پر آپ کی رازداری چھیننے کے لیے کافی ہے۔‘‘ اس ویڈیو میں سپریا شرینیت نے سخت انداز میں کہا ہے کہ ’’یہ نگرانی ہے، اور ہم سبھی کو بلاتفریق اس (قانون) کی مخالفت کرنی چاہیے۔‘‘

کانگریس نے ایک دیگر پوسٹ میں نئے انکم ٹیکس قانون سے متعلق کچھ اہم باتیں سامنے رکھی ہیں۔ اس میں لکھا گیا ہے کہ ’’مودی حکومت نیا انکم ٹیکس قانون لا رہی ہے۔ خبروں کے مطابق اس قانون کے نافذ ہونے کے بعد انکم ٹیکس افسران کو آپ کے ڈیجیٹل اکاؤنٹ تک پہنچنے کا حق مل جائے گا۔ حکومت کا افسر آپ کے ای میل، سوشل میڈیا، بینک اکاؤنٹ، ٹریڈنگ اکاؤنٹ کو جب چاہے چیک کر سکتا ہے، بس اسے شبہ ہونا چاہیے۔‘‘ کانگریس کا کہنا ہے کہ ’’یہ بے حد خطرناک ہے۔ مودی حکومت پہلے ہی ایجنسیوں کا غلط استعمال کرتی آ رہی ہے، اب اس قانون کی بدولت وہ جسے چاہے پریشان کر سکتی ہے، برباد کر سکتی ہے۔‘‘

نئے انکم ٹیکس قانون کو ہدف تنقید بناتے ہوئے کانگریس نے اسے ایک سازش کا حصہ قرار دیا ہے۔ کانگریس کا کہنا ہے کہ ’’اس قانون کا استعمال سیاسی دشمنی نکالنے کے لیے کیا جا سکتا ہے۔ لوگوں کے خلاف سازشاً اسے استعمال کیا جا سکتا ہے۔ یہ قانون جمہوریت کے اقدار پر حملہ ہے، یہ آئین سے حاصل رازداری کے حق پر حملہ ہے۔‘‘