کیا سوڈان دو حصوں میں تقسیم ہونے کو ہے؟

سوڈانی فوج نے کل یعنی21 مارچ کو دارالحکومت خرطوم میں صدارتی محل پر دوبارہ قبضہ کرنے کا اعلان کیا۔ سوڈان کی خانہ جنگی اب تیسرے سال میں داخل ہو چکی ہے اور توقع ہے کہ اب یہ ایک اہم موڑ پر ہے۔ اس خانہ جنگی میں ہزاروں لوگ لقمہ اجل بن چکے ہیں۔ سوڈان کی فوج اب پیرا ملٹری ریپڈ سپورٹ فورس (RSF) کے ارکان کو تلاش کرنے کے لیے سرچ آپریشن کر رہی ہے۔

سوڈان کے وزیر اطلاعات اور اس کے فوجی ترجمان نے تصدیق کی ہے کہ محل دوبارہ حکومت کے کنٹرول میں آ گیا ہے۔ وزیر خالد علی العیسر نے سوشل میڈیا پر لکھا، ’’آج پرچم لہرایا گیا، محل واپس لے لیا گیا اور فتح مکمل ہونے تک سفر جاری رہے گا۔‘‘ سوڈان میں گزشتہ چند سالوں سے جاری اس جنگ میں ایک طرف سوڈان کی فوج ہے اور دوسری طرف آر ایس ایف ہے اور دونوں کا مقصد ملک کا اقتدار اپنے ہاتھ میں لینا ہے۔

محل پر دوبارہ قبضہ سوڈانی فوج کے لیے ایک بڑی علامتی فتح ہے کیونکہ اپریل 2023 میں جنگ کے ابتدائی دنوں میں خرطوم کا زیادہ تر حصہ آر ایس ایف کے قبضے میں چلا گیا تھا۔ ابھی چند روز قبل آر ایس ایف کے رہنما جنرل محمد حمدان دگالو نے اپنے موقف پر قائم رہنے کا عہد کیا تھا۔ “یہ مت سوچیں کہ ہم محل سے پیچھے ہٹ جائیں گے،” انہوں نے گزشتہ ہفتے کہا تھا۔

اسی وقت، فوج اور اتحادی ملیشیا نے آہستہ آہستہ شہر کے شمالی اور مشرقی حصوں پر قبضہ کر لیا اور اپنے اہداف پر شدید حملے شروع کر دیے۔ جمعرات کی صبح، فوج نے محل کے جنوب میں آر ایس ایف کے ایک قافلے پر گھات لگا کر حملہ کیا۔ ایسا لگ رہا تھا جیسے آر ایس ایف کے سپاہی فرار ہونے کی کوشش کر رہے ہوں۔ اس کے بعد کل  فوج کے شانہ بشانہ لڑنے والے سوڈانی ملیشیا کے فوجیوں نے فتح کا جشن منایا۔

سوڈان میں اپریل 2023 میں فوج کے سربراہ جنرل عبدالفتاح برہان اور آر ایس ایف کے دگالو کے درمیان کئی مہینوں کی کشیدگی کے بعد جنگ چھڑ گئی تھی۔ دونوں افراد نے 2021 میں ایک فوجی بغاوت میں ایک ساتھ اقتدار پر قبضہ کر لیا تھا لیکن وہ اس بات پر متفق نہیں ہو سکے کہ اپنی افواج کو کیسے متحرک کیا جائے۔