حیدرآباد: تلنگانہ کے منچریال ضلع کے لکشٹی پیٹ میں پیش آئے ایک افسوسناک واقعہ میں کولڈ ڈرنک کا ڈھکن حلق میں پھنس جانے سے شیرخوار کی موت ہوگئی۔ تفصیلات کے مطابق، لکشٹی پیٹ بلدیہ کے 9ویں وارڈ سے تعلق رکھنے والے سریندر اپنی اہلیہ، بیٹی اور 9 ماہ کے کمسن بیٹے ردرائن کے ساتھ مموگوڈا میں اپنے رشتہ دار کے گھر ایک تقریب میں شریک ہوئے تھے۔
اسی دوران ردرائن کولڈ ڈرنک کی بوتل کا ڈھکن اپنے منہ میں ڈال کر کھیلنے لگا۔ کھیلتے ہوئے وہ ڈھکن اچانک اس کے حلق میں پھنس گیا جس سے اس کی سانس رک گئی۔
بچے کی حالت دیکھ کر والدین نے فوراً اس کے منہ سے ڈھکن نکالنے کی کوشش کی اور اُسے فوری طور پر مقامی پرائیویٹ اسپتال لے گئے۔ وہاں سے بچے کو منچریال کے سرکاری اسپتال منتقل کیا گیا، لیکن ڈاکٹروں نے معائنہ کے بعد بتایا کہ بچہ پہلے ہی مر چکا ہے۔
ہمیں فالو کریں
