حیدرآباد ۔ کے این واصف
حرم مکی میں خصوصاُ مطاف کا علاقے میں چوبیسوں گھنٹے ہزاروں کی تعداد میں طواف کرنے والے موجود ہوتے ہیں۔ زائرین کی موجودگی میں اس علاقہ کی صاف صفائی ایک بڑا چیالنج ہے۔ مگر صفائی کا ماہر عملہ مسجد الحرام میں صفائی کا کام محض 35 منٹ میں مکمل کرتاہے۔ جبکہ اس دوران زائرین کے معمولات میں کوئی فرق نہیں پڑتا۔
مسجد الحرام اور مسجد نبوی کی دیکھ بھال کی جنرل اتھارٹی کا کہنا ہے ساڑھے تین ہزار کارکنوں پر مشتمل صفائی کارکنان کی ٹیمیں 12 خصوصی واشنگ اور 697 کلینگ مشینوں کی مدد سے کام کرتی ہیں۔صفائی کے دوران مسجدالحرام سے یومیہ 70 ٹن ویسٹ جمع کیا جاتا ہے جو زیادہ ہجوم کے دنوں میں 100ٹن تک بڑھ جاتا ہے۔ انہیں مسجد الحرام اور اس سے باہر رکھے گئے تین ہزار سے زیادہ ویسٹ کنٹینرز میں منتقل کیا جاتا ہے۔
اتھارٹی کا کہنا ہے صفائی کے کاموں میں ماحول دوست مواد استعمال کیا جاتا ہے۔ صفائی کا کام زائرین اور نمازیوں کی آمد ورفت کو متاثر کیے بغیر 24 گھنٹے جاری رہتا ہے۔بیان میں اس بات پر زور دیا گیا کہ اس کا مقصد ضیوف الرحمن کی دیکھ بھال، ان کی صحت اور سیفٹی کو برقرار رکھنا ہے تاکہ وہ آسانی اور آرام کے ساتھ اپنی عبادت کی تکمیل کرسکیں۔
صفائی کارکنان کی کوشش ہوتی ہے کہ زائرین کے طواف اور عبادت میں کسی قسم کا خلل پیدا نہ ہو۔ یہ تمام کام تربیت یافتہ سعودی عملے کی نگرانی میں ہوتا ہے۔
