[]
نئی دہلی: سابق کانگریس صدر راہول گاندھی کی ہتک ِ عزت کیس میں سزا پر سپریم کورٹ کی طرف سے روک لگائے جانے کے ایک دن بعد رکن راجیہ سبھا اور سینئر وکیل کپل سبل نے آج کہا کہ انھوں نے راہول گاندھی کو مجرم قرار دیے جانے کو برسرعام غیرضروری قرار دیا تھا اور کہا تھا کہ یہ سزا برقرارنہیں رہے گی۔
کپل سبل نے اپنے ایک ٹوئٹ میں کہاکہ سپریم کورٹ نے راہول گاندھی کی سزا پر روک لگا دی ہے۔ جس دن راہول کو مجرم قرار دیا گیا تھا، میں نے برسرعام کہا تھا کہ انھیں مجرم قرار دیا جانا غیرضروری ہے اور یہ سزا برقرار نہیں رہے گی۔
میں نے جو وجہ بیان کی تھی سپریم کورٹ نے کل وہی وجہ بتائی ہے۔ یہ امر انتہائی بدبختانہ ہے کہ سیاسی ایجنڈا کے لیے عدالتی کارروائیوں کو استعمال کیا جارہا ہے۔
