رام جنم بھومی احاطہ کے پاس پکڑا گیا مشتبہ شخص، زرد ہیلمٹ میں کیمرہ لگائے کر رہا تھا کام

رام جنم بھومی کے گیٹ نمبر 10 پر تعینات سیکورٹی فورسز نے منگل کی دوپہر ایک مشتبہ افراد کو پکڑ کر پولیس کے حوالے کر دیا۔ بتایا جاتا ہے کہ مشتبہ شخص بائک پر گھوم رہا تھا۔ وہ زرد یعنی پیلے رنگ کا ہیلمٹ لگائے ہوئے تھا جس میں کیمرہ فٹ کیا ہوا تھا۔ جانچ کے دوران پولیس کو پتہ چلا کہ وہ شخص ’میپ اِن انڈیا‘ کا ملازم ہے اور وہ سروے کا کام کر رہا تھا۔ حالانکہ اس کے لیے ابھی کمپنی کو اجازت نہیں ملی ہے۔ فی الحال پولیس و خفیہ ایجنسیاں اس سے پوچھ تاچھ کر رہی ہیں۔

میڈیا رپورٹس کے مطابق منگل کی دوپہر چھتیس گڑھ باشندہ بھانو پٹیل بائک پر سوار ہو کر یلو زون میں گھوم رہا تھا۔ اس کے ہیلمٹ پر کیمرہ بھی لگا ہوا تھا۔ یہ دیکھ کر رام جنم بھومی کے گیٹ نمبر 10 پر تعینات سیکورٹی اہلکاروں نے اسے روک لیا اور تلاشی وغیرہ لینے کے بعد تھانہ رام جنم بھومی پولیس کو سونپ دیا۔ تھانہ میں پولیس کے سینئر افسران اور کئی خفیہ ایجنسیوں نے اس سے پوچھ تاچھ کی۔

سی او ایودھیا ایس پی گوتم نے بتایا کہ جانچ میں پتہ چلا ہے کہ مشتبہ شخص ’میپ اِن انڈیا‘ کا ملازم ہے۔ کمپنی نے ضلع انتظامیہ کے پاس سروے کی درخواست دی ہے لیکن ابھی اجازت نہیں ملی ہے۔ اس کے باوجود مذکورہ شخص سروے کر رہا تھا۔ یہ بھی جانکاری دی گئی کہ اس شخص کے بارے میں کمپنی کے افسران نے تصدیق کی ہے۔ اس کے آدھار کارڈ و دیگر شناختی کارڈ کی بنیاد پر اس کے پتہ وغیرہ کی بھی تصدیق کر لی گئی ہے۔ خبر لکھے جانے تک مشتبہ شخص کو چھوڑا نہیں گیا ہے اور پوچھ تاچھ کا عمل جاری ہے۔