ممبئی: ممبئی کی فیملی کورٹ نے جمعرات کے روز بھارتی کرکٹر یوزویندر چہل اور ان کی اہلیہ دھنشری ورما کی باہمی رضامندی سے طلاق کی درخواست کو منظور کر لیا۔ دونوں فریق عدالت میں پیش ہوئے، جہاں ان کی مشترکہ درخواست کو قبول کر لیا گیا۔ چہل کے وکیل نتن گپتا کے مطابق، فیملی کورٹ نے طلاق کے لیے دائر کی گئی مشترکہ درخواست پر فیصلہ دیتے ہوئے اسے منظور کر لیا ہے، کیونکہ فریقین نے رضامندی کی تمام شرائط پوری کر لی تھیں۔
چہل اور دھنشری ورما دسمبر 2020 میں رشتہ ازدواج میں منسلک ہوئے تھے، تاہم ان کی درخواست کے مطابق، وہ جون 2022 میں علیحدہ ہو چکے تھے۔ رواں سال 5 فروری کو دونوں نے باہمی رضامندی سے طلاق کے لیے فیملی کورٹ میں درخواست دائر کی تھی۔
چونکہ چہل انڈین پریمیئر لیگ (IPL) کے لیے مصروف ہونے والے ہیں، اس لیے بدھ کے روز بمبئی ہائی کورٹ نے فیملی کورٹ کو ہدایت دی کہ وہ ان کی طلاق کی درخواست پر جمعرات تک فیصلہ سنائے۔ آئی پی ایل کا آغاز 22 مارچ سے ہو رہا ہے، اور چہل اس سیزن میں پنجاب کنگز ٹیم کا حصہ ہیں۔
ہندو میرج ایکٹ کے مطابق، کسی بھی طلاق کی درخواست پر حتمی فیصلے سے قبل 6 ماہ کی مہلت (cooling-off period) دی جاتی ہے تاکہ فریقین کو مصالحت کا موقع مل سکے۔ تاہم، چہل اور دھنشری ورما نے عدالت سے اس مدت کو ختم کرنے کی درخواست کی تھی، جسے ہائی کورٹ نے قبول کر لیا۔
دونوں نے اپنی درخواست میں استدعا کی تھی کہ فیملی کورٹ کو ہدایت دی جائے کہ ان کی طلاق کی درخواست پر جلد فیصلہ دیا جائے۔
اس سے قبل، فیملی کورٹ نے 20 فروری کو یہ کہتے ہوئے مہلت ختم کرنے سے انکار کر دیا تھا کہ چہل نے طلاق کی شرائط کے مطابق دھنشری کو 4.75 کروڑ روپے میں سے صرف 2.37 کروڑ روپے ادا کیے ہیں۔ مزید یہ کہ، شادی کے مشیر (Marriage Counsellor) کی رپورٹ میں بھی کہا گیا تھا کہ مصالحتی عمل کی مکمل پیروی نہیں کی گئی ہے۔
تاہم، بمبئی ہائی کورٹ نے بدھ کے روز فیصلہ سناتے ہوئے کہا کہ باہمی رضامندی کی تمام شرائط پوری ہو چکی ہیں، کیونکہ طلاق کی حتمی منظوری کے بعد ہی مستقل مالی تصفیے کی بقیہ رقم ادا کی جانی تھی۔ اس فیصلے کے بعد، فیملی کورٹ نے جمعرات کو طلاق کی منظوری دے دی اور دونوں کے درمیان شادی کا قانونی طور پر اختتام ہو گیا۔
ہمیں فالو کریں
