حیدرآباد ۔ حیدرآباد کے محکمہ موسمیات نے تلنگانہ میں کل اتوار کو تیز ہواؤں کے ساتھ ژالہ باری کا امکان ہے۔ متحدہ عادل آباد، کریم نگر، ورنگل اضلاع کے لئے آرینج وارننگ جاری کی گئی ہے جبکہ متحدہ رنگا ریڈی، حیدرآباد، نلگنڈہ، محبوب نگر، میدک اضلاع کے لئے ایلو وارننگ جاری کی گئی ہے۔
گزشتہ رات ہوئی غیرموسمی بارش کے باعث کئی اضلاع میں فصلوں کو بھاری نقصان پہنچا۔ حیدرآباد میں کئی مقامات پر تیز ہواؤں کی وجہ سے درخت اور بجلی کے کھمبے گر گئے، جس کے نتیجہ میں بجلی کی سپلائی متاثر ہوئی۔ آصف آباد ضلع کے کئی منڈلوں میں کل شام ہوئی شدید بارش سے آم، جوار اور دھان کی فصلوں کو نقصان پہنچا۔ ضلع میں نقصانات کا جائزہ لیا جا رہا ہے۔نرمل ضلع کے کنٹالا، مدہول، بھینسہ منڈلوں میں گزشتہ رات ہوئی غیرموسمی بارش سے کسان مشکلات کا سامنا کر رہے ہیں۔ کسانوں کا مطالبہ ہے کہ حکومت خریداری مراکز قائم کرے اور مکئی کی فصل خریدے۔
راجنا سرسلہ ضلع کے کوناراو پیٹ،چندورتی، ویمولاواڑہ رورل، منڈلوں میں ژالہ باری کے باعث درخت سڑکوں پر گر گئے۔ کئی مقامات پر دھان اور آم کے باغات کو نقصان پہنچا۔کریم نگر ضلع کے چپہ ڈنڈی منڈل کے ویدورگٹہ گاؤں میں 35 ملی میٹر بارش ریکارڈ کی گئی۔
