ڈل جھیل کے کنارے پرواقع درگاہ حضرت بل میں ایک بڑی تعداد نے باجماعت نماز ادا کی اور بعد نماز موئے مقدس (ص) کے دیدار سے فیضیاب ہوئے۔
فائل تصویر آئی اے این ایس
وادی کے اطراف و اکناف میں حضرت علی (رض) کے یومِ شہادت پر روح پرور مجالس کا اہتمام کیا گیا۔ درگاہوں، امام بارگاہوں اور خانقاہوں میں رات بھر شب خوانی کی گئی، جبکہ درگاہ حضرت بل میں نمازِ پنجگانہ کے بعد زائرین نے موئے مقدس (ص) کے دیدار سے فیض حاصل کیا۔
یو این آئی اردو کے نامہ نگار نے بتایا کہ جموں و کشمیر میں ہفتے کے روز حضرت علی (رض) کا یومِ شہادت عقیدت و احترام کے ساتھ منایا گیا، اور اس مناسبت سے درگاہوں، امام بارگاہوں اور خانقاہوں میں روح پرور مجالس کا اہتمام کیا گیا۔
ڈل جھیل کے کنارے پرواقع آثار شریف درگاہ حضرت بل میں نمازِ ظہرین کے بعد لوگوں کی ایک بڑی تعداد نے باجماعت نماز ادا کی اور بعد ازاں موئے مقدس (ص) کے دیدار سے فیضیاب ہوئے۔دریں اثنا، حضرت علی (رض) کے یومِ شہادت کی مناسبت سے شیعہ آبادی والے علاقوں میں بھی رات بھر شب خوانی کا اہتمام کیا گیا۔
نامہ نگار کے مطابق، سری نگر، بارہ مولہ، بانڈی پورہ، بڈگام، پلوامہ سمیت تمام اضلاع میں چھوٹی بڑی مجالس اور جلوسوں کا انعقاد ہوا، جہاں قرآن خوانی، نوحہ خوانی، مرثیہ خوانی کے علاوہ شبیہِ تابوت کے جلوس بھی برآمد کیے گئے۔
سری نگر میں عزاداروں کی ایک عظیم الشان مجلس منعقد ہوئی، جس میں عزاداروں کی ایک بڑی تعداد نے شرکت کی۔اس موقع پر علماء نے حضرت علی (رض) کے فضائل، اوصاف، کمالات اور دین کے لیے ان کی خدمات کو اجاگر کیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
