حلال سرٹیفکیٹ: جمعیۃ علماء ہند نے سپریم کورٹ میں داخل کیا نیا حلف نامہ، آخر کیسے جاری کیا جاتا ہے حلال سرٹیفیکیٹ؟

اترپردیش حکومت کی فوڈ سیفٹی اینڈ ڈرگ ایڈمنسٹریشن نے نومبر 2023 میں حلال سرٹیفائیڈ مصنوعات پر پابندی عائد کر دی تھی۔ اس حوالے سے جمعیۃ علمائے ہند حلال ٹرسٹ نے سپریم کورٹ میں حلال مصنوعات پر عائد کی گئی پابندی کے خلاف عرضی داخل کی تھی۔ سپریم کورٹ میں اس سلسلے میں ٹرسٹ کی جانب سے نیا حلف نامہ داخل کیا گیا ہے۔ جس میں سالیسٹر جنرل تشار مہتا کی جانب سے حلال سرٹیفیکیشن سے متعلق کیے گئے تبصرے پر اعتراض کیا گیا ہے۔ ٹرسٹ کا کہنا ہے کہ اس سے حلال سرٹیفیکیشن کے عمل پر مزید تنازعہ پیدا ہو گیا ہے۔ آئیے ذیل میں جاننے کی کوشش کرتے ہیں حلال سرٹیفیکیشن کیا ہوتا ہے؟ اور کن کن مصنوعات کے لیے جاری کیا جاتا ہے؟

1. کیسے جاری ہوتا ہے حلال سرٹیفیکیٹ؟

کوئی کمپنی اپنی مصنوعات (پروڈکٹ) کو حلال سرٹیفائیڈ کرانا چاہتی ہے تو اسے ایک مکمل عمل سے گزرنا پرتا ہے۔ اس کے بعد ہی اسے حلال سرٹیفیکیٹ ملتا ہے۔ اس کے لیے کمپنی کو ایک آتھرائزڈ حلال سرٹیفیکیشن ایجنسی کے پاس جانا ہوتا ہے۔ ایجنسی کے ماہرین اس کمپنی کی مصنوعات کے اجزاء اور حفظان صحت کے معیارات کا معائنہ کرتے ہیں۔ اور اس بات کو یقینی بنایا جاتا ہے کہ مصنوعات میں سور کا گوشت، شراب، خون یا پھر کوئی ایسا عنصر شامل تو نہیں ہے جو اسلام کے قوانین کے تحت غیرقانونی مانا جاتا ہے۔

2. کتنے وقت کے لیے ملتا ہے سرٹیفیکیٹ؟

اس عمل میں کچھ مصنوعات کو لَیب میں بھی ٹیسٹ کیا جاتا ہے۔ تاکہ اس بات کو مکمل طور پر یقینی بنایا جا سکے کہ ان میں اس طرح کی کوئی بھی ایسی چیز موجود نہ ہو جو اس کے حلال ہونے کے معیار کو متاثر کرتی ہو۔ اگر مصنوعات تمام شرائط کو پورا کرتی ہے، اس کے بعد حلال سرٹیفیکیٹ جاری کر دی جاتی ہے۔ عام طور پر یہ سرٹیفیکیٹ 1 سے 3 سال تک کے لیے دیا جاتا ہے۔ علاوہ ازیں کمپنی کے مصنوعات کا وقتاً فوقتاً دوبارہ معائنہ ہوتا رہتا ہے۔

3. کن کن چیزوں کے لیے سرٹیفیکیٹ جاری ہوتا ہے؟

حلال سرٹیفیکیٹ کئی چیزوں کے لیے جاری کیا جاتا ہے۔ بنیادی طور پر کھانے پینے کی مصنوعات کے لیے حلال سرٹیفیکیٹ جاری کیا جاتا ہے۔ اس کے علاوہ ریستوران میں جو کھانا پیش کیا جاتا ہے اس کے لیے حلال سرٹیفیکیٹ جاری کیا جاتا ہے۔ کھانے پینے کی مصنوعات کے علاوہ دواسازی، کاسمیٹک اور پرسنل کیئر پروڈکٹس کے ساتھ ساتھ دیگر اشیاء کے لیے بھی حلال سرٹیفیکیٹ جاری کیا جاتا ہے۔

4. ہندوستان میں کون جاری کرتا ہے حلال سرٹیفیکیٹ؟

اگر ہندوستان کی بات کی جائے تو اس کے لیے کئی آتھرائزڈ ایجنسیاں ہیں، جو بین الاقوامی اسلامی تنظیموں کے ذریعہ منظور شدہ ہیں۔ ہندوستان میں حلال سرٹیفیکیٹ جاری کرنے والی ایجنسیوں میں جمعیت علمائے ہند ٹرسٹ، حلال انڈیا پرائیویٹ لمیٹڈ، حلال سرٹیفیکیشن سروسز انڈیا پرائیویٹ لمیٹڈ اور حلال کاؤنسل آف انڈیا شامل ہیں۔