بنگلور سنٹرل میں ایک مقامی کانگریس لیڈر حیدر علی کو بے دردی سے قتل کر دیا گیا۔ پولیس کے مطابق، حیدر علی، جو کانگریس رکن اسمبلی این اے حارث کے قریبی ساتھی تھے، ہفتہ کی رات تقریباً 1 بجے اپنے دوست کے ساتھ موٹر سائیکل پر جا رہے تھے جب ان پر اشوک نگر کے قریب گڑھوڑا مال کے پاس حملہ کیا گیا۔
پولیس کے مطابق، کچھ افراد نے علی کا پیچھا کیا اور انہیں گھیر کر جان لیوا حملہ کر دیا۔ میڈیا رپورٹ کے مطابق، علی کو فوری طور پر باؤرنگ اسپتال لے جایا گیا لیکن ڈاکٹروں نے انہیں مردہ قرار دے دیا۔ واقعہ اشوک نگر پولیس اسٹیشن کے قریب پیش آیا، جس کی وجہ سے پولیس نے فوری کارروائی کی۔
بنگلور سٹی کے ڈپٹی کمشنر آف پولیس (سینٹرل) شیکھر ایچ تکناور نے بتایا کہ حیدر علی، جو ایک ‘روڈی شیٹر’ تھے اور جن پر 11 مجرمانہ مقدمات درج تھے، ان پر رات 1 بجے سے 1:30 کے درمیان حملہ ہوا جب وہ ایک بار سے واپس آ رہے تھے۔ نامعلوم حملہ آوروں نے ان پر اچانک حملہ کر دیا اور خطرناک ہتھیاروں سے نشانہ بنایا۔ ان کے ڈرائیور کو معمولی چوٹیں آئیں۔ پولیس نے قتل کا مقدمہ درج کر لیا ہے اور تحقیقات جاری ہیں۔
ابھی تک کسی کو گرفتار نہیں کیا گیا، لیکن پولیس قاتلوں کی تلاش میں مصروف ہے۔ قتل کے بعد علی کے حامی بڑی تعداد میں اسپتال کے باہر جمع ہو گئے، جن میں سے بعض تلواریں اور دیگر ہتھیار رکھے ہوئے تھے۔ اس صورتحال سے عوام میں خوف و ہراس پھیل گیا اور پولیس کو ممکنہ کشیدگی کا خدشہ لاحق ہو گیا۔
پولیس کو شبہ ہے کہ یہ قتل گینگ وار کا نتیجہ ہو سکتا ہے، کیونکہ حیدر علی پہلے بھی کئی جرائم میں ملوث رہ چکے تھے۔ پولیس نے قتل کا مقدمہ درج کر کے ملزمین کو گرفتار کرنے کی کوششیں تیز کر دی ہیں۔
