حیدرآباد: حیدرآباد اور تلنگانہ کے مختلف اضلاع میں جمعرات کے روز شدید بارشوں نے نظام زندگی کو درہم برہم کر دیا، جس کے بعد محکمہ موسمیات نے اورینج الرٹ جاری کر دیا ہے۔ شہر کے مختلف علاقوں میں درجہ حرارت میں نمایاں کمی دیکھنے میں آئی، جبکہ گرج چمک اور تیز ہواؤں کے باعث کئی نشیبی علاقوں میں پانی جمع ہونے کی اطلاعات موصول ہوئیں۔
تلنگانہ کے عادل آباد، نظام آباد، میدک، سنگا ریڈی، وقارآباد، محبوب نگر، اور نارائن پیٹ میں شدید بارشوں کے باعث الرٹ جاری کیا گیا ہے۔ حیدرآباد میں دوپہر کے بعد اچانک بادل چھا گئے اور موسلا دھار بارش کا سلسلہ شروع ہو گیا، جس نے شمالی علاقوں کو زیادہ متاثر کیا۔ بعض مقامات پر ژالہ باری ہوئی جبکہ ہواؤں کی رفتار 40 سے 50 کلومیٹر فی گھنٹہ تک ریکارڈ کی گئی۔
محکمہ موسمیات نے پیش گوئی کی ہے کہ حیدرآباد اور تلنگانہ کے دیگر حصوں میں اگلے 48 گھنٹوں کے دوران شدید بارشوں کا سلسلہ جاری رہے گا۔ گرج چمک کے ساتھ مقامی سطح پر سیلاب کی صورتحال پیدا ہوسکتی ہے، جس سے شہریوں کو مشکلات کا سامنا کرنا پڑ سکتا ہے۔ ٹریفک کی روانی بھی شدید متاثر ہونے کا خدشہ ظاہر کیا جا رہا ہے۔
شہر کے مختلف علاقوں میں پانی جمع ہونے کی اطلاعات موصول ہوئیں، خاص طور پر جوبلی ہلز، گچی باؤلی، فلم نگر، سکندرآباد، بنجارہ ہلز، اور لنگم پلی میں موسلا دھار بارش نے معمولات زندگی متاثر کر دیے۔ عابدس، نامپلی، اور پٹن چیرو میں پانی کھڑا ہونے سے ٹریفک جام کی صورتحال پیدا ہوگئی۔
تلنگانہ اسٹیٹ ڈیزاسٹر مینجمنٹ اتھارٹی نے عوام کو احتیاطی تدابیر اختیار کرنے کی ہدایت دی ہے۔ شہریوں کو غیر ضروری سفر سے گریز کرنے، غیر محفوظ عمارتوں اور بجلی کے کھمبوں سے دور رہنے اور محکمہ موسمیات کی اپ ڈیٹس پر نظر رکھنے کا مشورہ دیا گیا ہے۔
اس دوران ناگر کرنول کے پدارا منڈل کے کودن پلی گاؤں میں ایک افسوسناک واقعہ پیش آیا، جہاں شدید بارش کے دوران آسمانی بجلی گرنے سے دو خواتین جاں بحق ہوگئیں۔ حکام نے کسانوں اور کھلے مقامات پر کام کرنے والے افراد کو خصوصی احتیاط برتنے کی ہدایت دی ہے۔
ماہرین موسمیات کا کہنا ہے کہ تلنگانہ میں جاری شدید بارشوں کا سبب آندھرا پردیش کے ساحلی علاقوں میں بننے والا سائیکلونک سرکولیشن ہے، جو خلیج بنگال سے آنے والی مرطوب ہواؤں کے ساتھ مل کر شدید بارشوں کا باعث بن رہا ہے۔ امکان ظاہر کیا جا رہا ہے کہ یہ موسمی نظام ہفتہ تک کمزور پڑ جائے گا، جس کے بعد موسم میں بہتری آ سکتی ہے۔
ہمیں فالو کریں
