حیدرآباد: شادی کا جھانسہ دے کر ایک خاتون کو بے رحمی سے قتل کرنے والے پجاری سائی کرشنا کو عمر قید کی سزا سنائی گئی ہے۔ رنگا ریڈی کورٹ نے چہارشنبہ کے روز دونوں طرف کی دلیلیں سننے کے بعد یہ فیصلہ سنایا۔
تفصیلات کے مطابق، آندھرا پردیش کے امبیڈکر کونسیما ضلع کے پی گناورم منڈل کے نریندر پورم گاؤں سے تعلق رکھنے والا ایّگاڑی وینکٹا سوریا سائی کرشنا، سروج نگر کے وینکٹیشور کالونی میں رہائش پذیر تھا۔
وہ وہاں کے مقامی مائیسما دیوالم میں پجاری کے طور پر خدمات انجام دے رہا تھا اور ساتھ ہی کنسٹرکشن کنٹریکٹر کا کام بھی کرتا تھا۔ سائی کرشنا کی شادی ہو چکی تھی اور اس کی ایک بیٹی بھی تھی۔
چینائی سے تعلق رکھنے والی کُروگنتی اپسرا (30) اپنی والدہ کے ساتھ اسی کالونی میں رہتی تھی۔ اپسرا نے ماضی میں کچھ فلموں اور سیریلز میں چھوٹے کردار ادا کیے تھے اور اس وقت ایک نجی ملازمت کر رہی تھی۔
اپسرا کی ملاقات سائی کرشنا سے ایک بھکتہ کے طور پر ہوئی اور یہ جان پہچان آہستہ آہستہ محبت میں تبدیل ہو گئی۔ دونوں کے درمیان قریبی تعلقات قائم ہو گئے، جس کے بعد اپسرا نے بار بار سائی کرشنا پر شادی کے لیے دباؤ ڈالنا شروع کر دیا۔ سائی کرشنا نے کسی بھی طرح اپسرا سے جان چھڑانے کا منصوبہ بنایا۔
اپنے منصوبے کے مطابق، 3 جون 2023 کو اس نے اپسرا کو کوئمبٹور چلنے کا جھانسہ دے کر کار میں ساتھ لے لیا۔ رات 11 بجے کے قریب، شمش آباد منڈل کے سلطان پلی علاقے میں ایک گایوں کے باڑے کے قریب ایسی جگہ لے گیا جہاں سی سی ٹی وی کیمرے موجود نہیں تھے۔
جب اپسرا گاڑی میں گہری نیند میں تھی، تو اس نے کار کے باڈی کور سے اس کا دم گھوٹنے کی کوشش کی۔ اپسرا نے مزاحمت کی تو سائی کرشنا نے پہلے سے ساتھ لایا ہوا ایک وزنی پتھر اس کے سر پر مار دیا، جس سے وہ موقع پر ہی دم توڑ گئی۔
بعد ازاں، سائی کرشنا نے اپسرا کی لاش کو کار کے باڈی کور میں لپیٹ کر ڈِکی میں رکھا اور اپنے گھر لے گیا۔ شام تک لاش سے بدبو آنے لگی، تو اس نے سرور نگر ایم آر او آفس کے پیچھے موجود ایک ڈرینج مین ہول میں اسے پھینک دیا۔
جب اپسرا کی والدہ نے اس سے اپنی بیٹی کے بارے میں پوچھا تو اس نے بہانہ بنایا کہ وہ اپنے دوستوں کے ساتھ بھدراچلم چلی گئی ہے۔ اس نے مزید کہا کہ اس نے خود اپسرا کو شمش آباد میں اس کے دوستوں کی کار میں بٹھایا تھا۔
بعد میں، اس نے اپسرا کے فون پر کئی بار کال کر کے یہ ظاہر کیا کہ وہ بھی پریشان ہے اور کچھ پتہ نہ ہونے کا ڈرامہ کیا۔ اس کے بعد، وہ اپنی ساتھی ارونا کے ساتھ شمش آباد آر جی آئی اے پولیس اسٹیشن پہنچا اور گمشدگی کی رپورٹ درج کروا دی۔
تاہم، پولیس کو سائی کرشنا کے بیانات پر شک ہوا، جس کے بعد اسے حراست میں لے کر پوچھ گچھ کی گئی، تو اس نے اپنا جرم قبول کر لیا۔رنگا ریڈی ضلع کی فاسٹ ٹریک کورٹ نے مقدمے کی سماعت کے بعد مجرم سائی کرشنا کو عمر قید کی سزا سنائی۔
ہمیں فالو کریں
