حیدرآباد ۔ کے این واصف
سعودی جنرل اتھارٹی آف سول ایوی ایشن ( جی اے سی اے) کے مطابق فروری 2025 میں مسافروں کی جانب سے 1169 مختلف قسم کی شکایات درج کرائی گئیں۔ اخبار 24 کے مطابق سب سے زیادہ شکایات بیگیج سروسز، اس کے بعد پروازوں اور ٹکٹ کے حوالے سے تھیں۔ایوی ایشن اتھارٹی کے مطابق سب سے کم شکایات سعودی ایئرلائنز کی رہیں۔ ایک لاکھ مسافروں پر 20 شکایات ریکارڈ کی گئیں۔
فلائی ناس ایک لاکھ پر 25 شکایات جبکہ فلائی اے ڈیل ایک لاکھ پر 31 شکایات موصول ہوئیں جبکہ شکایات بروقت نمٹانے کی شرح 100 فیصد رہی۔اتھارٹی کا کہنا ہے ایئرپورٹ کے حوالے سے مصروف ترین جدہ کے کنگ عبدالعزیز انٹرنیشنل ایئرپورٹ پر سب سے کم شکایات ریکارڈ ہوئیں۔ ایک لاکھ مسافروں پر شکایات کی شرح 0.4 فیصد رہی۔ یہ ایئرپورٹ سالانہ 6 ملین سے زیادہ مسافروں کو ہینڈل کرتا ہے۔
کل 22 شکایات ملیں اور انہیں بروقت نمٹانے کی شرح 100 فیصد رہی۔ 6 ملین سے کم مسافروں والے ایئرپورٹس میں ایئرپورٹ طائف انٹرنیشنل پر ایک لاکھ مسافروں پر شکایت کی شرح ایک فیصد رہی۔
