نئی دہلی ریلوے اسٹیشن بھگدڑ: راہل گاندھی نے قلی بھائیوں سے کی ملاقات، مسافروں کی جان بچانے کے لیے کیا اظہارِ شکر

پریاگ راج میں ’مہاکمبھ میلہ‘ تو ختم ہو گیا ہے، لیکن اس سے جڑی کچھ تلخ یادیں ہمیشہ کے لیے لوگوں کے ذہن میں موجود رہیں گی۔ ان تلخ یادوں میں نئی دہلی ریلوے اسٹیشن پر ہوئی بھگدڑ کا اندوہناک واقعہ بھی ہے جس میں کم از کم 18 لوگوں کی موت ہو گئی۔ مہاکمبھ جانے کے لیے ہزاروں کی تعداد میں جمع مسافروں نے جب متعین پلیٹ فارم کی جگہ کسی دوسرے پلیٹ فارم پر ٹرین آنے کی خبر سنی تو تیزی کے ساتھ وہاں پہنچنے کی کوشش کی، جس کے سبب کئی جانیں تلف ہو گئیں۔ جب یہ حادثہ ہوا تو وہاں موجود قلی بھائیوں نے کئی مسافروں کی جان بچائی اور وہ لاتعداد لوگوں کے لیے ایک فرشتہ ثابت ہوئے۔ ان قلی بھائیوں سے آج راہل گاندھی نے نئی دہلی ریلوے اسٹیشن پر پہنچ کر ملاقات کی۔

راہل گاندھی نے اپنے سوشل میڈیا پلیٹ فارم ’ایکس‘ پر قلی بھائیوں سے ملاقات کی کچھ تصویریں شیئر کی ہیں۔ ساتھ ہی انھوں نے یہ مطلع بھی کیا ہے کہ سبھی ہندوستانیوں کی جانب سے قلی بھائیوں کا وہ شکریہ ادا کرنے ریلوے اسٹیشن پہنچے تھے۔ اپنے پوسٹ میں راہل گاندھی نے لکھا ہے کہ ’’اکثر سب سے تاریکی بھرے وقت میں ہی انسانیت کی روشنی سب سے زیادہ چمکتی ہے۔ نئی دہلی ریلوے اسٹیشن پر بھگدڑ کے دوران قلی بھائیوں نے انسانیت کی مثال پیش کرتے ہوئے کئی مسافروں کی جان بچائی تھی۔ اس کے لیے میں نے ہندوستانی باشندوں کی طرف سے آج ان کا شکریہ ادا کیا۔‘‘

اس پوسٹ میں راہل گاندھی نے انتظامیہ سے گزارش کی ہے کہ وہ ایسے حادثوں سے سبق حاصل کریں۔ وہ لکھتے ہیں کہ ’’ایسے حادثوں سے سبق لینا ضروری ہے۔ بھیڑ کو قابو میں کرنا، جدید تکنیک کا استعمال، بہتر انفراسٹرکچر اور ایمرجنسی انتظامات کو مضبوط کر کے ان حادثات کو روکا جا سکتا ہے۔‘‘ انھوں نے مزید لکھا ہے کہ ’’امید ہے حکومت اس سمت میں ٹھوس قدم اٹھائے گی، تاکہ ہر طبقہ کے مسافر محفوظ سفر کر سکیں۔‘‘

راہل گاندھی کی قلی بھائیوں سے ملاقات کی کچھ تصویریں کانگریس نے بھی اپنے آفیشیل ’ایکس‘ ہینڈل پر شیئر کی ہیں۔ پارٹی نے اس سوشل میڈیا پوسٹ میں لکھا ہے کہ ’’حزب اختلاف کے قائد راہل گاندھی نے نئی دہلی ریلوے اسٹیشن پر قلی بھائیوں سے ملاقات کی۔ راہل گاندھی جی نے قلی بھائیوں کا پورے ملک کی طرف سے شکریہ ادا کیا، کیونکہ حادثہ کے وقت قلی بھائیوں نے انسانیت دکھاتے ہوئے جس طرح لوگوں کی مدد کی، وہ قابل تعریف تھا۔‘‘ اس پوسٹ میں یہ بھی لکھا گیا ہے کہ ’’امید ہے حکومت ایسے حادثات سے سبق لے گی، تاکہ آگے کبھی ایسے حادثات نہ ہوں۔‘‘