مہر خبررساں ایجنسی کی رپورٹ کے مطابق، فلسطین کی اسلامی جہاد موومنٹ کے سیکرٹری جنرل نے ایران کی مسلح افواج کے سربراہ سے ملاقات میں کہا کہ فلسطین اور لبنان میں مزاحمت کی فتوحات اسلامی جمہوریہ ایران کے تعاون اور موثر کردار کی بدولت حاصل ہوئیں اور اسلامی جمہوریہ ایران مزاحمت کا گھر ہے۔
انہوں نے مزید کہا کہ اسلامی جمہوریہ ایران کا آپریشن وعدہ صادق 1 اور 2 کے ذریعے براہ راست جنگ میں داخل ہونا ایک اسٹریٹجک تبدیلی اور خطے کی اقوام کے لئے حوصلہ افزا عمل ہے۔
اس موقع پر ایران کی مسلح افواج کے سربراہ میجر جنرل باقری نے کہا کہ اسلامی جمہوریہ ایران، جنگ، پابندیوں اور بیرونی دباؤ جیسے تمام مسائل کے باوجود فلسطین اور مزاحمت کی حمایت سے دستبردار نہیں ہوا اور اب بھی پوری طاقت کے ساتھ کھڑا ہے اور رہے گا۔
انہوں نے زور دیا کہ فلسطینی عوام کے خلاف ڈیڑھ سال سے جاری صیہونی ظلم اور 50 ہزار بچوں، خواتین اور بے گناہ فلسطینی شہداء کا خون ظالم رژیم کی نابودی جب کہ فلسطین کے استحکام کا باعث بنے گا۔
