سری نگر: منشیات کے خلاف جنگ کو جاری رکھتے ہوئے پولیس نے جنوبی کشمیر کے ضلع اننت ناگ میں الگ الگ کارروائیوں کے دوران 2 منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔
ایک پولیس ترجمان نے بتایا کہ پولیس اسٹیشن مٹن کو ایک مصدقہ اطلاع موصول ہوئی کہ فاروق احمد کمار ولد محمد سبحان کمار ساکن کھول چوہار مٹن منشیات فروشی میں ملوث ہے اور اس نے اپنے رہائشی مکان میں بھاری مقدار میں منشیات ذخیرہ کر رکھا ہے۔
انہوں نے کہا کہ اس ضمن میں پولیس اسٹیشن مٹن میں این ڈی پی ایس ایکٹ کے تحت ایک کیس درج کرکے تحقیقات شروع کی گئیں۔
بیان میں کہا گیا کہ اطلاع موصول ہونے پر اننت ناگ پولیس اور متعلقہ ایگزیکیٹو مجسٹریٹ پر مشتمل ایک ٹیم تشکیل دی گئی جنہوں نے مذکورہ مکان کی تلاشی لی۔
پولیس ترجمان نے بتایا کہ تلاشی کے دوران مکان سے 10 کلو چرس پائوڈر اور 2 لاکھ 16 ہزار 6 سو 50 روپیے نقدی بر آمد کئے گئے۔انہوں نے کہا کہ اس کے بعد مکان مالک کو گرفتار جبکہ ممنوعہ مواد کو ضبط کیا گیا۔
ان کا کہنا ہے کہ اس ضمن میں مزید تحقیقات جاری ہیں۔
پولیس ترجمان نے بتایا کہ ایک اور کارروائی کے دوران پولیس اسٹیشن پہلگام کی ایک پارٹی نے لانگہ بل پہلگام میں ایک ناکے کے دوران ایک شخص کو روکا۔
انہوں نے کہا کہ تلاشی کے دوران اس کی تحویل سے 120 گرام چرس بر آمد کیا گیا جس کے بعد اس کی گرفتاری عمل میں لائی گئی۔گرفتار شدہ کی شناخت شاہ رخ احمد شیخ ولد محمد رمضان شیخ ساکن شیخ محلہ سلر کے طور پر کی گئی ہے۔
پولیس نے اس ضمن میں پولیس اسٹیشن پہلگام میں متعلقہ دفعات کے تحت ایک کیس درج کرکے مزید تحقیقات شروع کی ہیں۔موصوف ترجمان نے بتایا کہ اننت ناگ پولیس معاشرے سے منشیات کی بیخ کنی کے لئے پر عزم ہے اور انہوں نے عوام سے اس ضمن میں بھر پور تعاون فراہم کرنے کی اپیل کی ہے۔
ہمیں فالو کریں
