چھٹی نا منظور ہونے پر نا راض سرکاری ملازم نے ساتھیوں پر چاقو سے حملہ کر دیا!

کولکتہ کے نیو ٹاؤن علاقے میں اس وقت ہنگامہ مچ گیا جب ایک شخص کو سڑک پر خون آلود چاقو کے ساتھ دیکھا گیا۔ اسے غصہ میں  دیکھ کر کسی کو اس کے قریب جانے کی ہمت نہ ہوئی۔ بعد میں پتہ چلا کہ یہ شخص سرکاری ملازم تھا اور اس نے چاقو سے حملہ کر کے اپنے کئی ساتھیوں کو زخمی کر دیا۔

یہ سنسنی خیز واقعہ جمعرات کی دوپہر تقریباً 12 بجے پیش آیا۔ اس وقت کولکتہ کے نیو ٹاؤن میں کریگاری بھون کے سامنے ایک شخص کو ہاتھ میں چاقو لیے گھومتے ہوئے دیکھا گیا۔ اسے دیکھتے ہی ڈیوٹی پر موجود ٹریفک پولیس اہلکار نے اسے روکنے کی کوشش بھی کی۔ اچانک، مصروف سڑک کے بیچوں بیچ، وہ غصے سے بھرا ادھیڑ عمر آدمی ہاتھ میں خون آلود چاقو لہرا رہا تھا۔

صورتحال کی سنگینی کو محسوس کرتے ہوئے ٹریفک پولیس اہلکار نے بار بار اس شخص سے چاقو پھینکنے کی درخواست کی ،اور آخر کار غصے میں آدمی نے چاقو گرا دیا۔ اس کے بعد بدھ نگر پولس نے فوری طور پر اس شخص کو اپنی تحویل میں لے لیا۔ ذرائع کا کہنا ہے کہ پولیس نے بعد میں اسے گرفتار کر لیا۔

پولیس کے مطابق گرفتار شخص کی شناخت امت کمار سرکار کے طور پر کی گئی ہے۔ وہ مغربی بنگال حکومت کے ایک محکمے میں کام کرتا ہے۔ ذرائع کا دعویٰ ہے کہ اس نے اپنے دفتر میں چھٹی کی درخواست دی تھی۔ لیکن اسے چھٹی نہیں ملی۔ جبکہ اسے چھٹی کی اشد ضرورت تھی۔

چھٹی مسترد ہونے پر سرکاری ملازم نے اپنے دفتر میں اپنے ساتھیوں سے اس بات پر بحث شروع کر دی۔ جس کے بعد اس نے غصے میں آکر اپنے ساتھیوں پر چاقو سے حملہ کردیا۔ اس حملے کا نتیجہ یہ ہوا کہ اس دوران کچھ لوگ زخمی بھی ہوئے۔

ارتکاب جرم کے بعد ملزم امت کمار سرکار خون آلود چاقو اور بیگ لے کر وہاں سے نکل کر سڑک پر پہنچ گیا۔ معلوم ہوا ہے کہ اس سے قبل چاقو کے حملے میں ایک سکیورٹی گارڈ بھی زخمی ہوا تھا۔ ذرائع کے مطابق پولیس پہلے ہی گرفتار امت سے بات کرکے پورے معاملے کو سمجھنے کی کوشش کر رہی ہے۔ پولیس جاننا چاہتی ہے کہ وہ اتنا ناراض کیوں تھا؟ اس کے پاس چاقو کہاں سے آیا؟ ہر چیز کی چھان بین کی جا رہی ہے۔ اس بات کی بھی جانچ کی جا رہی ہے کہ آیا امت کسی وجہ سے ذہنی طور پر پریشان تو نہیں تھا۔