بیگو سرائے: بہار کے بیگوسرائے ضلع میں پولیس نے چہارشنبہ کو دو ہندو نوجوانوں کو گرفتارکرلیا، جو سرسوتی پوجا کے دوران برقع پہن کر اسٹیج پر ناچ رہے تھے۔ یہ واقعہ پھلوادیہ پولیس اسٹیشن کی حدود میں پھلوادیہ گنج علاقے کے دھوبی ٹولا، وارڈ نمبر 20 میں پیش آیا۔
یہ گرفتاری اس وقت عمل میں آئی جب سوشل میڈیا پر ایک ویڈیو وائرل ہوئی، جس میں دو نوجوانوں کو سیاہ برقع پہن کر ایک بھوجپوری گانے پر اسٹیج پر غیر مہذب انداز میں رقص کرتے ہوئے دیکھا گیا۔ ویڈیو سامنے آنے کے بعد عوامی حلقوں میں شدید ردعمل دیکھنے میں آیا، جس کے بعد پولیس حرکت میں آئی اور ملزمان کو شناخت کر کے گرفتار کر لیا۔
ڈی ایس پی رمیش پرساد سنگھ کے مطابق، جیسے ہی پولیس کو اطلاع ملی، فوراً ایک ٹیم کو موقع پر بھیجا گیا۔ تحقیقاتی عمل کے دوران ویڈیو کی تصدیق کی گئی اور ملزمان کی شناخت کر کے انہیں حراست میں لے لیا گیا۔
پولیس کے مطابق، ملزمان سے تفتیش جاری ہے تاکہ معلوم کیا جا سکے کہ آیا ان کی حرکت جان بوجھ کر اشتعال انگیزی پھیلانے کے لیے تھی یا یہ محض ایک ناکام مذاق تھا۔ پولیس حکام نے کہا کہ تحقیقات مکمل ہونے کے بعد ہی مزید کارروائی کے بارے میں فیصلہ کیا جائے گا۔ یہ واقعہ سوشل میڈیا پر تیزی سے وائرل ہو رہا ہے اور مختلف حلقوں سے اس پر ملا جلا ردعمل سامنے آ رہا ہے۔
ہمیں فالو کریں
