سری نگر: وادی کشمیر میں شبانہ درجہ حرارت مسلسل نقطہ انجماد سے نیچے ریکارڈ ہونے سے شبانہ سردیوں کا زور قائم ہے اور اس دوران سیاحتی مقام گلمرگ سرد ترین جگہ رہا ہے۔
اطلاعات کے مطابق وادی کے پہلگام، کوکرناگ اور کپوارہ کے کچھ علاقوں میں گذشتہ چوبیس گھنٹوں کے دوران ہلکی بارشیں ہوئی ہیں۔
محکمہ موسمیات کے مطابق وادی میں وادی میں 6 سے 8 فروری تک موسم جزوی یا مجموعی طور پر ابر آلود مگر خشک رہنے کا امکان ہے۔
موصوف ترجمان نے کہا کہ 9 اور 10 فروری کو ایک بار پھر کہیں کہیں ہلکی برف باری یا بارشوں کا امکان ہے۔
انہوں نے کہا کہ وادی میں 11 اور 12 فروری کو بھی مطلع ابر آلود رہنے کے ساتھ کہیں کہیں ہلکے درجے کے برف و باراں کا امکان ہے۔ادھر وادی میں شبانہ درجہ حرارت نقطل انجماد سے نیچے درج ہونے سے شبانہ سردیوں کا زور قائم ہے۔
گرمائی دارلحکومت سری نگر میں کم سے کم درجہ حرارت منفی1.2 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی1.8 ڈگری سینٹی گریڈ ریکارڈ ہوا تھا۔
سری نگر میں 21 دسمبر یعنی چلہ کلان کے پہلے ہی دن شبانہ درجہ حرارت منفی 8.5 ڈگری سینٹی گریڈ ریکارڈ ہوکر رواں موسم کی سرد ترین رات ریکارڈ ہوئی تھی جو گذشتہ 133 برسوں میں سری نگر میں ماہ دسمبر میں ریکارڈ ہونے والا تیسرا کم ترین درجہ حرارت ہے۔
وادی کے شہرہ آفاق سیاحتی مقام گلمرگ سرد ترین مقام رہا ہے جہاں کم سے کم درجہ حرارت منفی7.5 ڈگری سینٹی گریڈ ریکارڈ کیا گیا۔
وادی کے ایک اور سیاحتی مقام پہلگام میں کم سے کم درجہ حرارت منفی3.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی4.6 ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی1.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی1.5 ڈگری سینٹی گریڈ ریکارڈ ہوا تھا۔
ہمیں فالو کریں
