جموں و کشمیر: نوشہرہ میں زوردار دھماکہ، بارودی سرنگ پھٹنے سے 6 فوجی جوان زخمی

جموں و کشمیر کے نوشہرہ میں زوردار دھماکہ کی وجہ سے علاقہ میں افرا تفری کا ماحول پیدا ہو گیا۔ بتایا جاتا ہے کہ یہ دھماکہ نوشہرہ واقع ایک کان میں ہوا ہے اور بارودی سرنگ پھٹنے سے یہ واقعہ پیش آیا۔ موصولہ اطلاع کے مطابق نوشہرہ کے بھوانی سیکٹر واقع مکڑی علاقہ میں دھماکہ ہوا ہے جس میں کم از کم 6 جوان زخمی ہوئے ہیں۔ ان زخمی جوانوں کو فوری طور پر علاج کے لیے راجوری کے فوجی اسپتال میں داخل کرایا گیا ہے۔

افسران نے اس دھماکہ سے متعلق جانکاری دیتے ہوئے بتایا کہ جوان جس وقت گشت پر تھے، تبھی نوشیرا سیکٹر میں کھمبا قلعہ کے پاس صبح تقریباً 10.45 بجے ایک فوجی غلطی سے بارودی سرنگ کے اوپر چلا گیا۔ اس وجہ سے ہی وہاں پر دھماکہ ہوا اور کچھ فوجی زخمی ہو گئے۔ افسران نے یہ بھی بتایا کہ زخمیوں کو فوراً اسپتال لے جایا گیا اور فی الحال سبھی کی حالت مستحکم ہے۔ افسران کا کہنا ہے کہ کنٹرول لائن کے پاس آگے کے علاقوں میں بارودی سرنگیں ہیں جو بارش کی وجہ سے بہہ جاتی ہیں۔ اسی وجہ سے اس طرح کے حادثات پیش آتے ہیں۔

اس سے قبل 9 دسمبر 2024 کو جموں کے پونچھ میں بھی اسی طرح کا دھماکہ ہوا تھا جس میں ایک جوان شہید ہو گیا تھا۔ فوجی ترجمان نے اس وقت بتایا تھا کہ 25 نیشنل رائفلز کے حولدار وی سبیا وریکنٹا کی پونچھ کے تھانیدار ٹیکری میں گشت کے دوران ایک بارودی سرنگ دھماکہ کے بعد ہو گئی۔