دہلی اسمبلی انتخاب: ووٹرس کی حتمی فہرست آئی سامنے، الیکشن کمیشن کے ذریعہ مکمل تفصیل جاری

دہلی اسمبلی انتخاب کے لیے تاریخوں کا اعلان چند دنوں میں ہونے والا ہے۔ اس سے عین قبل الیکشن کمیشن کے ذریعہ فائنل الیکٹورل رول جاری کر دیا گیا ہے۔ اس کے مطابق دہلی میں مجموعی طور پر 1 کروڑ 55 لاکھ 24 ہزار 858 ووٹرس ہیں۔ اس میں 83 لاکھ 49 ہزار 645 مرد اور 71 لاکھ 73 ہزار 952 خاتون ووٹرس ہیں۔ تیسری جنس کے ووٹرس کی تعداد 1261 ہے۔ دی گئی جانکاری کے مطابق 2 لاکھ 8 ہزار 302 ووٹرس ایسے ہیں جو پہلی بار ووٹ ڈالیں گے۔

فائنل الیکٹورل رول یعنی ووٹرس کی حتمی فہرست میں مجموعی ووٹرس کی تعداد 29 اکتوبر کو جاری ڈرافٹ ووٹر لسٹ سے 1.09 فیصد زیادہ ہے۔ اب تک ووٹر شناختی کارڈ پانے کے لیے فرضی دستاویز جمع کرنے کے معاملے میں 24 لوگوں کے خلاف 8 ایف آئی آر درج کی گئی ہیں۔ چیف الیکٹورل افسر دہلی نے نئے ووٹر شناختی کارڈ حاصل کرنے کے لیے فرضی دستاویز جمع کرنے کے خلاف سخت تنبیہ کی ہے۔

قابل ذکر ہے کہ 29 اکتوبر 2024 کو الیکشن کمیشن نے جو ڈرافٹ ووٹر لسٹ جاری کی تھی، اس کے ساتھ 29 اکتوبر سے 28 نومبر تک لوگوں کے اعتراضات طلب کیے گئے تھے۔ ڈرافٹ ووٹر لسٹ جاری ہونے کے وقت ووٹر کی تعداد 1 کروڑ 53 لاکھ 57 ہزار 529 تھی۔ اس وقت الیکشن کمیشن نے دہلی میں سبھی 6 منظور شدہ سیاسی پارٹیوں کو ووٹر لسٹ کی ہارڈ کاپی اور سافٹ کاپی بھیجی تھی۔ سیاسی پارٹیوں کے ساتھ سی ای او سطح کے ساتھ ساتھ ڈی ای او سطح پر میٹنگیں ہوئیں۔ اس میں ایس ایس آر میں ان کی شراکت داری طلب کی گئی۔ دہلی کے لوگوں کی جانکاری کے لیے اطلاع بھی جاری کی گئی۔ عوام کی سہولت کے لیے سی ای او دہلی کی ویب سائٹ پر ڈرافٹ ووٹر لسٹ اپلوڈ کی گئی تھی۔