’روس نے طیارہ حادثہ کے ذمہ داروں کو سزا دینے کی قسم کھائی‘، آذربائیجان کا دعویٰ

آذربائیجان ایئرلائنس کا طیارہ گزشتہ 25 دسمبر کو حادثہ کا شکار ہو گیا تھا۔ اس حادثہ کا ذمہ دار آذربائیجان نے روس کو ٹھہرایا تھا اور اس کے لیے روسی صدر ولادمیر پوتن نے معافی بھی مانگ لی ہے۔ اب خبریں سامنے آ رہی ہیں کہ روس نے حادثہ کے ذمہ داروں کو سزا دینے کی قسم کھائی ہے۔ یہ دعویٰ آذربائیجان ی طرف سے کیا جا رہا ہے۔ اس کا کہنا ہے کہ روس نے قسم کھا لی ہے کہ وہ طیارہ حادثہ کے لیے ذمہ دار لوگوں کو سزا ضرور دلائے گا۔

یہ دعویٰ 30 دسمبر کو آذربائیجان کے ایڈووکیٹ جنرل نے کیا۔ انھوں نے بتایا کہ روسی جانچ ایجنسی نے ان سے وعدہ کیا ہے کہ قصورواروں کو انصاف کے کٹہرے میں لایا جائے گا۔ اس سے قبل آذربائیجان کے صدر الہام علییف نے مطالبہ کیا تھا کہ قزاقستان میں حادثہ کا شکار ہوئے طیارہ پر غلطی سے گولی چلانے کی ذمہ داری روس لے۔ حادثہ کا شکارہ ہوئے اس طیارہ میں سوار 67 مسافروں میں سے 38 کی موت ہو گئی تھی اور کئی دیگر زخمی ہوئے تھے۔

بہرحال، روسی افسران کی طرف سے یہ واضح نہیں کیا گیا ہے کہ طیارہ پر ان کی ایئر ڈیفنس میزائل نے حملہ کیا تھا۔ حالانکہ روسی صدر ولادمیر پوتن نے آذربائیجان کے صدر الہام علییف سے معافی مانگی ہے، لیکن 29 دسمبر کو علییف نے روس پر معاملے کو ’کور اَپ‘ کرنے کا الزام لگایا۔ انھوں نے کہا کہ روسی افسر اس پورے حادثہ پر لیپا پوتی کرنے کی کوشش کر رہے ہیں۔