کانگریس صدر کھڑگے نے کسانوں، نوجوانوں اور خواتین کے لیے کانگریس کی 15 گارنٹیوں کو بتایا انتہائی اہم

لوک سبھا انتخاب 2024 کا اعلان ہو چکا ہے اور سبھی پارٹیوں کی سرگرمیاں اب مزید بڑھنے والی ہیں۔ حالانکہ پہلے سے ہی سبھی سیاسی پارٹیاں انتخابی مہم میں زور و شور سے مصروف ہیں۔ آج لوک سبھا انتخاب کا شیڈول جاری ہونے سے قبل کانگریس صدر ملکارجن کھڑگے نے بنگلورو میں ایک پریس کانفرنس کیا جس میں مرکز کی مودی حکومت کو شدید تنقید کا نشانہ بنایا۔ انھوں نے اس موقع پر کانگریس کی 15 گارنٹیوں کا تذکرہ بھی کیا اور کہا کہ یہ کسانوں، نوجوانوں اور خواتین کے لیے انتہائی اہم ہیں۔

پریس کانفرنس میں کھڑگے نے پی ایم مودی پر الزام لگایا کہ انھوں نے سبھی لیبر ایکٹ کے ساتھ ساتھ مزدوروں کے فلاحی منصوبوں کو بھی کمزور کر دیا۔ انھوں نے کہا کہ ’’کانگریس پارٹی نے سماجی تحفظ، مناسب تنخواہ اور مزدوروں کی حالت میں بہتری کے لیے کئی قانون بنائے۔ بدقسمتی سے اس ایک دہائی میں وزیر اعظم مودی نے سبھی لیبر ایکٹس کے ساتھ ساتھ مزدوروں سے متعلق فلاحی منصوبوں کو بھی کمزور کر دیا ہے۔ یہاں تک کہ منریگا مزدوروں کو ان کی پوری مزدوری نہیں مل رہی ہے اور ریاستی حکومت کو مستقل پیسہ بھی جاری نہیں کیا جاتا ہے۔‘‘

کانگریس کے ذریعہ دی گئی گارنٹیوں کا تذکرہ کرتے ہوئے ملکارجن کھڑگے نے کہا کہ کانگریس نے کسان نیائے، یوا نیائے، مہیلا نیائے کے لیے 15 گارنٹی کا اعلان کیا ہے۔ ہر ’نیائے‘ (انصاف) کے پانچ نکات ہیں جس سے یہ سماجی، معاشی و سیاسی انصاف فراہم کرنے کے لیے 15 نیائے بنتے ہیں۔ آج ہم مزید پانچ گارنٹی کا اعلان کرتے ہیں جس میں ’شرمک نیائے‘ اور ’حصہ داری نیائے‘ شامل ہیں۔‘‘