برج بھوشن سنگھ کی رہائش سے ہٹایا گیا ڈبلیو ایف آئی دفتر، وزارت کھیل نے ظاہر کیا تھا اعتراض

وزارت کھیل کی طرف سے حال ہی میں سخت اعتراض ظاہر کیے جانے کے بعد 29 دسمبر کو ریسلنگ فیڈریشن آف انڈیا (ڈبلیو ایف آئی) کا دفتر اس کے سابق صدر اور بی جے پی رکن پارلیمنٹ برج بھوشن شرن سنگھ کی رہائش سے ہٹا دیا گیا ہے۔ خبر رساں ایجنسی پی ٹی آئی نے ایک ذرائع کے حوالے سے بتایا ہے کہ برج بھوشن کے احاطہ کو خالی کرنے کے بعد ڈبلیو ایف آئی نئی دہلی میں ایک نئے پتہ سے کام کرے گا۔ ڈبلیو ایف آئی کا نیا دفتر نئی دہلی کے ہری نگر علاقہ میں ہے۔

واضح رہے کہ وزارت کھیل نے 24 دسمبر کو سنجے سنگھ کی قیادت والے نو تشکیل ڈبلیو ایف آئی پینل کو معطل کر دیا تھا۔ سنجے سنگھ کے ڈبلیو ایف آئی صدر منتخب ہونے کے تین دن بعد وزارت کی طرف سے یہ قدم اٹھایا گیا تھا۔ اس سخت کارروائی کے پیچھے ایک سبب برج بھوشن کی رہائش سے چل رہے دفتر کو بھی بتایا گیا تھا۔

قابل ذکر ہے کہ وزارت کھیل نے اپنے خط میں کہا تھا کہ ’’فیڈریشن کا کام سابق عہدیداروں (برج بھوشن) کی طرف سے کنٹرولڈ احاطہ سے چلایا جا رہا ہے، جو وہ مبینہ احاطہ بھی ہے جس میں کھلاڑیوں کے جنسی استحصال کا الزام لگایا گیا ہے اور حال میں عدالت اس معاملے کی سماعت کر رہی ہے۔‘‘ وزارت نے یہ بھی کہا تھا کہ نیا پینل سابق (ڈبلیو ایف آئی) عہدیداروں کے پورے کنٹرول کے تحت کام کر رہا تھا، جو قومی کھیل کوڈ کے مطابق نہیں تھا۔