سعودی عرب کے مفتی اعظم، سینئر علماء کی کونسل کے چیئرمین اور سائنسی تحقیق و فتاویٰ کے جنرل صدر شیخ عبدالعزیز آل الشیخ نے ائمہ اور مبلغین کو اخلاص پر توجہ دینے اور ریاکاری سے بچنے کی تلقین کی ہے۔ العربیہ ڈاٹ نیٹ پر شائع خبر کے مطابق، انہوں نے کہا کہ مساجد میں نمازوں اور خطبات کی فلم بندی اور سوشل میڈیا پر نشر کرنا شکوک و شبہات میں شامل ہے، جو ناپسندیدہ عمل ہے۔
یہ فتویٰ وزارت اسلامی امور، دعوت و رہنمائی کے اس فیصلے کے تناظر میں جاری کیا گیا ہے جس میں مساجد میں نمازوں اور لیکچرز کی فلم بندی اور سوشل میڈیا پر نشر کرنے کو روکا گیا تھا۔ شیخ عبدالعزیز آل الشیخ نے اس فیصلے کی توثیق کرتے ہوئے کہا کہ اس کا مقصد اخلاص کو برقرار رکھنا اور غلطیوں کے پھیلاؤ کو روکنا ہے۔
