بھوپال: وزیر اعظم نریندر مودی نے آج اس بات پر زور دیا کہ تین شعبے – ٹیکسٹائل، ٹورزم اور ٹیکنالوجی – ہندوستان کے ترقی یافتہ مستقبل میں بہت بڑا کردار ادا کرنے والے ہیں۔
مسٹر مودی دا رالحکومت بھوپال میں دو روزہ گلوبل انویسٹرس سمٹ کی افتتاحی تقریب سے خطاب کررہے تھے۔
اس دوران مدھیہ پردیش کے گورنر منگو بھائی پٹیل، وزیر اعلیٰ ڈاکٹر موہن یادو کے ساتھ ہندوستان اور بیرون ملک کے کئی نامور صنعت کار اور کئی ممالک کے سفیر تقریب میں موجود تھے۔
وزیر اعظم نے کہا کہ تین شعبے – ٹیکسٹائل، ٹورزم اور ٹیکنالوجی – ہندوستان کے ترقی یافتہ مستقبل میں بہت بڑا کردار ادا کرنے جا رہے ہیں۔
ہندوستان کا ٹیکسٹائل سیکٹر کروڑوں لوگوں کو روزگار فراہم کرتا ہے۔
مدھیہ پردیش، ایک طرح سے، ہندوستان کا ‘کاٹن کیپٹل’ ہے۔ ہندوستان کی تقریباً 25 فیصدآرگینک کاٹن سپلائی مدھیہ پردیش سے ہی ہوتی ہے۔
انہوں نے کہا کہ مدھیہ پردیش ملبری سلک کا بھی ملک کا سب سے بڑا پروڈیوسر ہے۔ یہاں کی چندری اور مہیشور دنیا میں مشہور ہیں۔ ان میں سرمایہ کاری کرنے سے سرمایہ کاروں کو عالمی پہچان ملے گی۔
حکومت میڈیکل ٹیکسٹائل اور جیو ٹیکسٹائل کو فروغ دے رہی ہے۔ اس کے لیے قومی مشن شروع کیا گیا ہے۔ سات بڑے ٹیکسٹائل پارک میں سے ایک مدھیہ پردیش میں بنایا جا رہا ہے۔
انہوں نے کہا کہ ہندوستان سیاحت میں بھی نئی جہتیں جوڑ رہا ہے۔ مدھیہ پردیش کی سیاحت کی ایک مہم تھی، ایم پی عجب ہے، سب سے غضب ہے۔
ریاست میں نرمدا کے آس پاس قبائلی سیاحت نے ترقی کی ہے۔ یہاں بہت سے نیشنل پارکس ہیں، ہیلتھ اور ویلنیس میں بھی سرمایہ کاری کا امکان ہے۔
یہاں پرائیویٹ پبلک پارٹنرشپ کو بھی فروغ دیا جا رہا ہے۔
مسٹر مودی نے کہا کہ ہندوستان کی تاریخ میں ایسا موقع پہلی بار آیا ہے، جب پوری دنیا ہندوستان کے بارے میں اتنی پر امید ہے۔
پوری دنیا میں، عام لوگ ہوں، ماہرین ہوں، مختلف ممالک ہوں یا ادارے، سبھی کو ہندوستان سے بہت امیدیں ہیں۔
پچھلے چند ہفتوں میں جو تبصرے سامنے آئے ہیں وہ یقینی طور پر ہندوستان میں ہر سرمایہ کار کے حوصلے کو بڑھا رہے ہیں۔
عالمی بینک نے کہا ہے کہ ہندوستان آنے والے سالوں میں دنیا کی سب سے تیزی سے ترقی کرنے والی معیشت بنا رہے گا۔
موسمیاتی تبدیلی پر ایک عالمی تنظیم نے کہا کہ جہاں کچھ ممالک صرف بات کرتے ہیں، ہندوستان نتائج لاکر دکھاتا ہے۔
انہوں نے کہا کہ ایسی کئی مثالیں دی جا سکتی ہیں جو ہندوستان پر دنیا کے اعتماد کی عکاسی کرتی ہیں۔
یہ اعتماد ہندوستان کی ہر ریاست کا اعتماد بڑھا رہا ہے اور اس عالمی سرمایہ کار سمٹ میں بھی نظر آرہا ہے۔
ہمیں فالو کریں
