اتوار کو پارٹی ہیڈکوارٹر میں منعقدہ پریس کانفرنس کے دوران اکھلیش یادو نے کہا کہ 2022 میں رامپور کے ضمنی انتخاب کے وقت جس طرح انتخابی افسران اور پولیس اہلکاروں کی تعیناتی کی گئی تھی، وہ سب کے سامنے ہے۔ ان کے مطابق اسی ماڈل کو مغربی بنگال میں بھی اپنایا گیا، جہاں مرکزی فورسز اور نیم فوجی دستوں کا ایک متوازی نظام قائم کیا گیا۔ انہوں نے الزام لگایا کہ نہ صرف سیکورٹی کے لیے الگ ڈھانچہ بنایا گیا بلکہ مقامی پولیس کے متوازی بھی ایک الگ انتظام کھڑا کیا گیا۔
اکھلیش یادو نے کہا کہ انہیں اطلاع ملی ہے کہ اس پورے عمل کے ذریعے انتخابی ماحول کو ایک خاص سمت میں لے جانے کی کوشش کی گئی۔ تاہم انہوں نے اس یقین کا اظہار بھی کیا کہ مغربی بنگال میں ایک بار پھر ممتا بنرجی کی قیادت میں حکومت قائم ہوگی۔ انہوں نے کہا کہ ’’دیدی تھیں، دیدی رہیں گی، وہ لڑیں گی اور جیتیں گی بھی۔‘‘
