’آگستا ویسٹ لینڈ‘ معاملے میں کرشچین مشیل کو سپریم کورٹ نے سنائی راحت بھری خبر، ضمانت دینے کا فیصلہ

آگستا ویسٹ لینڈ ہیلی کاپٹر گھوٹالہ میں ملزم کرشچین مشیل جیمس کو سپریم کورٹ سے بڑی راحت ملی ہے۔ عدالت نے سی بی آئی سے جڑے کیس میں مشیل کو ضمانت دے دی ہے۔ عدالت عظمیٰ نے مشیل کو 6 سال تک جیل میں رہنے کی بنیاد پر ضمانت دی ہے۔ جسٹس وکرم ناتھ اور سندیپ مہتا کی بنچ نے مشروط ضمانت دیتے ہوئے کہا ہے کہ مشیل کو پاسپورٹ رینیو کر کے سرینڈر کرنا ہوگا۔

اس سے قبل دہلی ہائی کورٹ نے سی بی آئی سے جڑے معاملے میں ضمانت دینے سے انکار کر دیا تھا۔ اس کے خالف مشیل نے سپریم کورٹ میں عرضی داخل کی تھی۔ عدالت نے اس سے قبل کرشچین مشیل جیمس کی طرف سے داخل ضمانت عرضی کو یہ کہتے ہوئے خارج کر دیا تھا کہ جیمس کی یہ دلیل قابل قبول نہیں کہ اسے اس بنیاد پر ضمانت دی جائے کہ وہ معاملے میں نصف سزا کاٹ چکا ہے۔ جیمس نے سی آر پی سی کی دفعہ 436 اے کے تحت ضمانت طلب کی تھی۔ اس میں کہا تھا کہ کسی شخص کو ضمانت پر رِہا کیا جا سکتا ہے۔

قابل ذکر ہے کہ 3600 کروڑ روپے کے آگستا ویسٹ لینڈ معاملے میں مبینہ بچولیہ کرشچین مشیل جیمس 6 سال سے جیل میں ہے۔ اس معاملے کی جانچ سی بی آئی کر رہی ہے۔ 18 فروری کو جسٹس وکرم ناتھ اور جسٹس سندیپ مہتا کی بنچ نے کہا کہ جیمس گزشتہ 6 سال سے حراست میں ہے، جبکہ معاملے کی جانچ اب بھی جاری ہے۔ سپریم کورٹ کا کہنا ہے کہ جیمس کو ذیلی عدالت کے ذریعہ طے شرائط کے تھت ضمانت پر رہا کیا جائے گا۔