[]
احمدآباد: جیسے جیسے سلمان خان اور کٹرینہ کیف کی آنے والی فلم ’ٹائیگر 3‘کی ریلیز قریب آرہی ہے بھائی جان مداحوں کو ایک کے بعد ایک تحفے دے رہے ہیں۔
میکرز بھی سلمان خان کے مداحوں کو حیران کرنے کا کوئی موقع نہیں چھوڑ رہے ہیں۔ اس فلم کے ساتھ یش راج فلمز نے کرکٹ ورلڈکپ 2023 کے حوالہ سے اسٹار اسپورٹس کے ساتھ بہت بڑا تعاون کیا ہے۔
یش راج نے دیوالی پر ریلیز ہونے والی سلمان خان کی فلم ٹائیگر3کی بڑے پیمانے پر تشہیر کیلئے براڈ کاسٹ نیٹ ورک، اسٹار اسپورٹس کے ساتھ تعاون کیاہے۔ جس میں آپ کو پورے ورلڈکپ کے دوران شیر کی دھاڑ سننے کو ملے گی۔
واضح رہے کہ کرکٹ ورلڈکپ کی تاریخ میں یہ پہلی بار ہونے جا رہا ہے کہ کسی فلم کے ساتھ اتنا بڑا مارکیٹنگ تعاون ہو رہا ہے۔ کرکٹ ورلڈکپ کے تمام میاچس میں آپ کو ’ٹائیگر‘ کی دھاڑ سنائی دے گی۔ یش راج نے سلمان خان کی سب سے زیادہ انتظار کی جانے والی فلم ’ٹائیگر3‘ کی بڑے پیمانے پر تشہیر کیلئے ایک مارکیٹنگ اسوسی ایشن بنائی ہے۔
اگر رپورٹس پر یقین کیا جائے تو ٹائیگر 3 کی پہلی پروموشن ہندوستان اور پاکستان میچ کے دوران شروع ہوگی جو 14 اکتوبر کو چلائی جائے گی اور اس فلم کا ٹریلر 16 اکتوبر کو سب کے سامنے ہوگا۔ رپورٹس کے مطابق سلمان خان نے کرکٹ ورلڈکپ 2023 کیلئے پورے ٹورنامنٹ اور ہندوستان بھر میں ہونے والے تمام اہم میچوں کیلئے مشترکہ برانڈڈ پرومو بھی شوٹ کیے ہیں۔
منیش شرما کی ہدایت کاری میں بننے والی ’ٹائیگر3‘ کے ٹریلر کو لیکر انٹرنیٹ پر کافی تجسس ہے۔ یہ فلم یش راج فلمز کی جاسوسی کائنات کے اگلے باب کی نقاب کشائی کرنے والی ہے۔ ’را‘ کے ایجنٹ اویناش سنگھ راٹھور کی کہانی بیان کرنے والی ٹائیگر فرنچائز اب فلم ’پٹھان‘ کے ساتھ اس جاسوسی کائنات کا حصہ بن گئی ہے۔
فلم ’ایک تھا ٹائیگر‘ میں اویناش سنگھ راٹھور پاکستانی سازش کا پردہ فاش کرتے ہوئے ایک پاکستانی ایجنٹ کی محبت میں گرفتار ہوجاتے ہیں۔ فلم ’ٹائیگر زندہ ہے‘ کی کہانی بھی کچھ ایسی ہی ہے اور وہاں دونوں ملکر نرسوں کو آئی ایس کی قید سے آزاد کراتے ہیں۔
واضح رہے کہ ہندوستانی کرکٹ بورڈ ہفتہ کو ہونے والے اس میاچ کو بہت خاص بنانے جارہاہے۔ اس میاچ میں میگا اسٹار امیتابھ بچن‘ رجنی کانت کے علاوہ سنگر اریجیت سنگھ اور دیگر کو بھی خاص طورپر مدعو کیا گیاہے۔ ہند۔پاک میاچ کے آغاز سے قبل ایک رنگارنگ تقریب بھی منعقد کی جائے گی جس میں بالی ووڈ ستاروں کے علاوہ دیگر کئی اہم شخصیتیں بھی شرکت کریں گی۔
