[]
نئی دہلی: ہندوستان کی عمر رسیدہ آبادی غیر معمولی شرح سے بڑھ رہی ہے اور 2021 میں 138 ملین سے بڑھ کر 2031 تک 194 ملین تک پہنچنے کا اندازہ لگایا گیا ہے، جو کہ 41 فیصد دہائی کا اضافہ ہے۔
ہیلپ ایج انڈیا، بزرگوں کی دیکھ بھال اور حقوق کا ایک معروف خیراتی ادارہ بزرگوں کی دیکھ بھال کرنے والوں کو تربیت دینے اور ان کو بوڑھوں سے متعلق ذہنی صحت کے خدشات کی شناخت اور ان سے نمٹنے میں مدد کرنے پر توجہ مرکوز کر رہا ہے۔
تنظیم نے اولڈ ایج ہومز کو سنبھالنے والے مینیجرز کے لیے تربیتی اور حساسیت کی ورکشاپس کا انعقاد کیا ہے۔ ان ورکشاپس میں حصہ لینے کے بعد اولڈ ایج ہومز کا چارج سنبھالنے والے مینیجرز نے اولڈ ایج ہومز میں رہنے والے معمر افراد کی ذہنی صحت کے مسائل کے بارے میں اعلیٰ سطح کی بیداری دکھائی ہے۔
ان ورکشاپس کا مقصد مینیجرز کو اس قابل بنانا تھا کہ وہ اولڈ ایج ہومز میں بزرگوں کی ذہنی تندرستی کے لیے ضروری اقدامات کر سکیں اور ان کے خدشات جیسے کہ ڈپریشن، اضطراب اور ڈیمنشیا کو دور کریں۔
ہیلپ ایج انڈیا ہیلتھ کیئر کے مشن ہیڈ ڈاکٹر ریتو رانا نے کہاکہ “ہیلپ ایج انڈیا آج ‘سارتھک’ کا ایک سال منا رہا ہے، یہ ایک پہل ہے جو گزشتہ سال ورلڈ مینٹل ہیلتھ ڈے کے موقع پر شروع کیا گیا تھا اور اس مسئلے پر بیداری پھیلانے کے لیے شروع کیا گیا تھا۔
اس اقدام کے اہم نتائج برآمد ہوئے ہیں اور گوا اور نئی دہلی میں ہماری ورکشاپس میں حصہ لینے والے تقریباً 62.5 فیصد اولڈ ایج ہوم مینیجرز نے ڈیمنشیا، بے چینی اور ڈپریشن سے متعلق مسائل کے بارے میں آگاہی کی بہتر سطح کوپیش کیا۔ ہمیں امید ہے کہ اس پروجیکٹ کے تحت ہم ایسے 10,000 دیکھ بھال کرنے والوں کو حساس بنا سکتے ہیں کیونکہ ضرورت مسلسل بڑھ رہی ہے اور ابھی بہت کچھ کرنے کی ضرورت ہے۔
انہوں نے کہا کہ ذہنی صحت سے متعلق مسائل کے حوالے سے لوگوں کی رائے بدلنے کے لیے کوششیں کرنے کی اشد ضرورت ہے۔ ورکشاپس کا مقصد کمیونٹی کی بنیاد پر ذہنی صحت کی دیکھ بھال کی حمایت کو مضبوط بنا کر بزرگوں کی نفسیاتی بہبود کو فروغ دینا ہے۔
