غزہ پر حملے بند کیے جائیں اور جنگ بندی کی طرف واپس آیا جائے: فرانسیسی صدر

فرانس کے صدر ایمانوئل ماکرون نے اتوار کے روز اسرائیلی وزیر اعظم نیتن یاہو سے ایک فون کال کے دوران کہا ہے کہ غزہ پر حملے بند کیے جائیں اور جنگ بندی کی طرف واپس آیا جائے۔ دوسری طرف اسرائیل نے عید الفطر پر بھی غزہ کی پٹی پر وحشیانہ حملے کیے ہیں۔

فرانسیسی صدر نے پلیٹ فارم “ایکس” پر لکھا ہے کہ میں نے اسرائیلی وزیراعظم سے غزہ پر حملے ختم کرنے اور جنگ بندی پر واپس آنے کا مطالبہ کیا ہے جسے حماس کو قبول کرنا چاہیے۔ میں نے فوری طور پر انسانی امداد کو دوبارہ شروع کرنے کی ضرورت پر زور دیا ہے۔

ماکرون نے اسرائیل سے لبنان میں جنگ بندی پر سختی سے عمل کرنے کا بھی مطالبہ کیا جہاں اسرائیل نے چار ماہ کی کمزور جنگ بندی کے بعد جمعہ کے روز بیروت کے جنوبی مضافاتی علاقے پر بھی بمباری کی ہے۔ غزہ میں حالیہ میدانی پیش رفت میں فلسطینی ہلال احمر نے اتوار کے روز اعلان کیا کہ اس نے 14 طبی عملے کی لاشیں برآمد کر لی ہیں جو ایک ہفتہ قبل غزہ کی پٹی میں ایمبولینسوں پر اسرائیلی فوج کی فائرنگ سے مارے گئے تھے۔

ہلال احمر نے ایک بیان میں کہا ہے کہ اب تک برآمد ہونے والی لاشوں کی تعداد 14 ہو گئی ہے جن میں ہلال احمر کے 8 پیرا میڈیکس، 5 سول ڈیفنس عملہ اور اقوام متحدہ کے ایک ادارے کا ایک ملازم شامل ہے۔ بیان میں اقوام متحدہ کی ایجنسی کے ملازم سے متعلق یہ وضاحت نہیں کی گئی کہ وہ کس جگہ کام کر رہا تھا۔

یہ پیرامیڈیکس 23 مارچ کو جنوبی غزہ کی پٹی میں رفح میں ایمبولینسوں پر اسرائیلی فائرنگ میں مارے گئے تھے۔ اسرائیلی فوج نے اعتراف کیا ہے کہ اس کی افواج نے ایمبولینسوں کو مشتبہ سمجھنے کے بعد ان پر فائرنگ کی ہے۔ رفح شہر کے محلے تل السلطان میں یہ فائرنگ مصری سرحد کے قریبی علاقے پر نئے اسرائیلی حملے کے چند روز بعد ہوئی ہے۔ اسرائیلی فوج نے 18 مارچ کو غزہ پر دوبارہ بمباری شروع کردی ہے۔