نئی دہلی: غزہ پٹی میں جاری اسرائیلی فورسز کی بربریت کے نتیجے میں گزشتہ 10 دنوں میں 900 فلسطینی شہید ہوچکے ہیں۔ غزہ میں فلسطینی وزارت صحت کے مطابق گزشتہ 24 گھنٹوں میں اسرائیلی بمباری اور حملوں کے باعث مزید 43 فلسطینی شہید ہوگئے جبکہ 115 افراد زخمی ہوئے۔
جنگ بندی کے خاتمے کے بعد اسرائیلی حملے 18 مارچ سے دوبارہ شروع ہوئے تھے جن میں اب تک 896 فلسطینی شہید ہوچکے ہیں اور تقریباً 2000 افراد زخمی ہوئے ہیں۔
غزہ پٹی میں 7 اکتوبر 2023 سے جاری اسرائیلی حملوں کے نتیجے میں شہادتوں کی تعداد 50 ہزار 251 سے تجاوز کرچکی ہے جبکہ ایک لاکھ 14 ہزار سے زائد فلسطینی زخمی ہوئے ہیں۔ ان حملوں کی شدت سے فلسطینی عوام کی زندگی اور سلامتی شدید خطرات میں ہیں
اور عالمی برادری سے اس قتل عام کے خاتمے اور فلسطینیوں کے حقوق کے تحفظ کے لیے فوری اقدامات کا مطالبہ کیا جا رہا ہے۔ان تازہ اعداد و شمار کے بعد غزہ میں انسانی بحران میں مزید اضافہ ہوا ہے، جس کے باعث عالمی سطح پر غم و غصہ اور مذمت کی لہر دوڑ گئی ہے۔
