حیدرآباد ۔ کے این واصف
ماہ رمضان میں زائرین کی تعداد موسم حج سے کئی گناہ زیادہ ہوجاتی ہے۔ لہٰذا مسجد الحرام میں آنے والے زائرین کی تعداد معلوم کرنے کے لیے داخلی دروازوں پر اسمارٹ اسکینرز نصب کیے گئے ہیں۔
سبق نیوز کے مطابق حرمین شریفین کے امور کے نگران ادارے کی جانب سے مسجد الحرام میں آنے والوں کی تعداد کا درست ریکارڈ رکھنے کے لیے اسمارٹ سسٹم استعمال کیا جا رہا ہے۔حساس اور جدید ترین سسٹم کے اسکینر مسجد الحرام کے دروازوں کے اوپر اور دہلیز کے نیچے نصب کیے گئے ہیں جیسے ہی کوئی شخص مسجد الحرام میں داخل ہونے کے لیے دہلیز کو عبور کرتا ہے حساس اسکینر فوری طورپر انسانی حرکت کو ریکارڈ کر لیتے ہیں۔
جدید اسکینرز سے حاصل ہونے والا ڈیٹا مرکزی کنٹرول روم کو خود کار طریقے سے ارسال کیا جاتا ہے جہاں سے مسجد الحرام میں داخل ہونے والوں کی تعداد کو فوری ریکارڈ کرلیا جاتا ہے۔زائرین کی تعداد کو ریکارڈ کرنے کے علاوہ جہاں لوگوں کی تعداد زیادہ ہوتی ہے اس مقام پر موجود اہلکاروں کو ہدایت کی جاتی ہے کہ افراد کی تعداد مقررہ حد تک پہنچ چکی ہے۔
جس کے بعد زائرین کو متبادل دروازوں کی جانب بھیجا جاتا ہے جس سے ازدحام کو کنٹرول کرنے میں بھی مدد ملتی ہے۔
