دبئی: آسٹریلیا کے سابق کپتان اور اسٹار بیٹسمین اسٹیو اسمتھ (Steve Smith) نے ون ڈے کرکٹ سے ریٹائرمنٹ کا اعلان کردیا ہے۔ انہوں نے کہا کہ اب وہ مزید ون ڈے نہیں کھیلیں گے اور فوری طور پر ریٹائر ہو رہے ہیں۔
اسٹیو اسمتھ نے حالیہ چیمپئنز ٹرافی میں آسٹریلیا کی کپتانی کی تھی، کیونکہ پیٹ کمنز کی غیر موجودگی میں انہیں یہ ذمہ داری سونپی گئی تھی۔ تاہم، منگل کے روز آسٹریلیا کو شکست کا سامنا کرنا پڑا، جس کے بعد 35 سالہ اسمتھ نے ون ڈے کرکٹ کو خیرباد کہنے کا اعلان کیا۔
اسٹیو اسمتھ نے اپنے ون ڈے کیریئر میں 170 میچز کھیلے، جن میں انہوں نے 5,800 رنز بنائے۔ ان کے ریکارڈ میں 12 سنچریاں اور 35 نصف سنچریاں شامل ہیں۔
ریٹائرمنٹ کے اعلان کے دوران، اسمتھ نے اپنے ون ڈے کیریئر کو یادگار قرار دیا۔ انہوں نے کہا: “میرا ون ڈے سفر لاجواب رہا، میں نے ہر لمحے کو انجوائے کیا۔ میرے کیریئر میں کئی ناقابلِ فراموش یادیں ہیں، دو ورلڈ کپ جیتنا میرے لیے فخر کی بات ہے۔ میں خوش قسمت رہا کہ میں نے بہترین کھلاڑیوں کے ساتھ اپنا کرکٹ کیریئر شیئر کیا۔”
اسمتھ نے کہا کہ آسٹریلیا کو 2027 ورلڈ کپ کے لیے ابھی سے تیاری شروع کرنی چاہیے۔ وہ اب ٹیسٹ کرکٹ پر توجہ مرکوز کر رہے ہیں اور ورلڈ ٹیسٹ چیمپئن شپ فائنل کھیلنے کے لیے پرجوش ہیں۔ انہوں نے تصدیق کی کہ وہ ویسٹ انڈیز اور انگلینڈ کے خلاف ٹیسٹ سیریز کا بھی حصہ ہوں گے۔
ون ڈے کرکٹ میں سب سے زیادہ رنز بنانے والے آسٹریلوی بیٹسمینوں میں اسٹیو اسمتھ 12ویں نمبر پر ہیں۔ 2015 سے 2025 تک، انہوں نے آسٹریلیا کے لیے 64 میچز میں قیادت کی۔ اسمتھ کی ریٹائرمنٹ کے بعد آسٹریلوی ٹیم کو نئے قائد اور بیٹنگ لائن میں تجربہ کار بیٹسمین کی کمی محسوس ہوگی۔
ہمیں فالو کریں
