دہلی کو وزیر اعلیٰ کے لیے 20 فروری تک کرنا پڑے گا انتظار، حلف برداری تقریب میں شامل ہوں گے این ڈی اے کے وزرائے اعلیٰ

دہلی اسمبلی انتخاب کے نتائج برآمد ہوئے ایک ہفتہ سے زیادہ گزر چکے ہیں، لیکن ابھی تک وزیر اعلیٰ کے نام کا اعلان نہیں کیا گیا ہے۔ لوگوں کی نظریں سیاسی سرگرمیوں پر ہیں اور وہ انتظار کر رہے ہیں کہ کب بی جے پی دہلی کے نئے وزیر اعلیٰ کا نام ظاہر کرے گی۔ اب لوگوں کا انتظار ختم ہونے والا ہے۔ ذرائع سے ملی اطلاع کے مطابق 19 فروری کو پہلے بی جے پی قانون ساز اسمبلی کی میٹنگ ہوگی اور اس کے بعد 20 فروری کو دہلی کابینہ کی حلف برداری کی تقریب ہوگی۔ حلف برداری تقریب میں شرکت کے لیے این ڈی اے کی حکمرانی والی ریاستوں کے وزرائے اعلیٰ اور نائب وزرائے اعلیٰ کو دعوت دی جائے گی۔ اسی روز این ڈی اے کی حکمرانی والی ریاستوں کے وزرائے اعلیٰ کی میٹنگ بھی دہلی میں ہی منعقد ہوگی۔

دہلی حکومت کی حلف برداری اور حکومت کی تشکیل کے حوالے سے پیر (17 فروری) کو شام میں ایک اہم میٹنگ ہونے والی ہے۔ اس میٹنگ میں حلف برداری تقریب کے انچارج ونود تاوڑے اور ترون چُگھ موجود رہیں گے۔ دہلی بی جے پی کے صدر وریندر سچدیوا اور دہلی بی جے پی کے افسران بھی موجود رہیں گے۔ اس میٹنگ میں نئی حکومت کی حلف برداری کی تاریخ، وقت اور جگہ کا تعین کیاجائے گا۔ حلف برداری کی تیاریاں، بیٹھنے کا بندوبست اور مہمانوں کی فہرست کو بھی حتمی شکل دی جائے گی۔

اس درمیان 27 سال بعد دہلی کے اقتدار پر قابض ہونے والی بی جے پی کی جانب سے حکومت بنانے میں تاخیر کے حوالے سے دہلی کی قائم مقام وزیر اعلیٰ آتشی نے طنز کستے ہوئے کہا کہ ’’آج 17 تاریخ ہو گئی ہے دہلی انتخاب کے نتیجے آئے 10 دن گزر چکے ہیں۔ 8 فروری کو نتیجے آئے اور دہلی والوں کو امید تھی کہ 9 تاریخ کو انہیں اپنے وزیر اعلیٰ کی اطلاع مل جائے گی اور 10 کو وہ حلف لے لیں گے۔ دہلی کے عوام انتظار کرتے رہ گئے۔ آج 10 روز ہو گئے ہیں لیکن بی جے پی وزیر اعلیٰ کے نام پر کوئی فیصلہ نہیں لے پائی ہے۔‘‘ علاوہ ازیں آتشی نے کہا کہ ’’آج ثابت ہو گیا کہ بی جے پی کے پاس کوئی وزیر اعلیٰ کا چہرہ نہیں ہے۔‘‘ ساتھ ہی انہوں نے وزیر اعظم مودی پر طنز کستے ہوئے کہا کہ ’’آج یہ بات صاف ہو گئی ہے کہ وزیر اعظم مودی جی کو اپنے 48 اراکین اسمبلی میں سے کسی پر بھی بھروسہ نہیں ہے۔ انہیں معلوم ہے کہ ان میں سے ایک بھی رکن اسمبلی حکومت چلانے کی اہلیت نہیں رکھتے ہیں۔‘‘