حیدرآباد کی مندر میں گوشت ملنے کے واقعے کی تحقیقات مکمگ
حیدرآباد: شہر کے ٹپہ چبوترہ پولیس اسٹیشن کے حدود میں واقع سنکٹا ویموچنا ہنومان مندر میں گوشت ملنے کے معاملے کی تحقیقات مکمل کر لی گئی ہیں۔ پولیس کی جانب سے جاری کردہ تفصیلات کے مطابق یہ واقعہ کسی انسانی مداخلت کا نتیجہ نہیں بلکہ ایک بلی کی حرکت تھی جو گوشت کا ٹکڑا مندر میں لے کر آئی تھی۔
پولیس کے مطابق آج صبح تقریباً 08:20 بجے پولیس کو اطلاع ملی کہ مدینہ ہوٹل، نٹراج نگر کے قریب واقع سنکٹا ویموچنا ہنومان مندر کے احاطے میں شیو مندر کے اندر گوشت کا ایک ٹکڑا موجود ہے، جس کا وزن تقریباً 250 گرام تھا۔
اطلاع ملتے ہی پولیس موقع پر پہنچ گئی جبکہ اے سی پی، ایڈیشنل ڈی سی پی، اور ڈی سی پی سمیت سینئر افسران نے بھی صورتحال کا جائزہ لینے کے لیے مندر کا دورہ کیا۔ معاملے کی تہہ تک پہنچنے کے لیے چار خصوصی ٹیمیں تشکیل دی گئیں جنہوں نے قریبی سی سی ٹی وی فوٹیج کا تجزیہ شروع کیا۔
پولیس کو ایک سی سی ٹی وی فوٹیج حاصل ہوا جس میں واضح طور پر دیکھا گیا کہ مندر کے شمالی جانب ایک بلی گوشت کا ٹکڑا اپنے منہ میں لے کر احاطے میں داخل ہو رہی ہے۔ مزید تحقیقات میں یہ ثابت ہو گیا کہ شیو لنگم کے پیچھے گوشت رکھنے کی ذمہ دار یہی بلی تھی اور اس واقعے میں کسی قسم کی شرارت یا سازش کا کوئی پہلو شامل نہیں ہے۔
پولیس حکام نے عوام سے اپیل کی ہے کہ اس معاملے میں افواہیں یا غلط معلومات نہ پھیلائی جائیں اور کسی بھی غیر مصدقہ خبر پر یقین نہ کریں۔ پولیس کمشنر نے اس واقعہ کی فوری اور مؤثر تحقیقات کرنے والی پولیس ٹیم کی کارکردگی کیستائشکی۔
تحقیقات کے ثبوت کے طور پر متعلقہ سی سی ٹی وی فوٹیج بھی جاری کر دی گئی ہے۔
