’ہم سب نے مل کر دباؤ ڈالا تب جا کر مرکزی حکومت نے لینڈ سلائڈنگ کو قدرتی آفت قرار دیا‘، وائناڈ میں پرینکا گاندھی کا بیان

وائناڈ سے رکن پارلیمنٹ پرینکا گاندھی کیرالہ کے دورے پر ہیں۔ اس دوران پیر (10 فروری) کو نیلامبور میں انھوں نے یو ڈی ایف کے بوتھ لیول لیڈران کی میٹنگ میں شرکت کی۔ میٹنگ میں شامل لیڈران سے خطاب کرتے ہوئے پرینکا گاندھی نے کہا کہ وائناڈ لینڈ سلائڈنگ کو قدرتی آفت قرار دینے کی بات مرکزی حکومت نے قبول کر لی ہے۔ پارلیمنٹ اور اسمبلی میں ہم سب نے مل کر جو دباؤ ڈالا، یہ اسی کا نتیجہ ہے کہ حکومت کو یہ مطالبہ قبول کرنا پڑا۔

کانگریس لیڈر پرینکا گاندھی نے کہا کہ حکومت کو متاثرین کے لیے مزید امدادی رقوم بھیجنی ہوں گی۔ یہ کچھ ایسا ہے، جس کے لیے انہیں خوشی ہے کہ ہم اسے حاصل کرنے میں کامیاب ہوئے۔ علاوہ ازیں انہوں نے کہا کہ یہاں کے لوگوں کو اور بھی کئی طرح کے چیلنجز کا سامنا کرنا پڑ رہا ہے۔ لوگوں کے سامنے صحت، تعلیم اور روزگار جیسی پریشانیاں ہیں۔ ان چیلنجز کو مل کر حل کرنے کی ضرورت ہے۔ اس سے قبل 9 فروری کو پرینکا گاندھی نے ملپّورم میں انسان-مویشی ٹکراؤ کا مسئلہ اٹھاتے ہوئے کہا کہ انہوں نے اس حوالے سے پہلے بھی آواز اٹھائی تھی اور آگے بھی اٹھاتی رہیں گی۔

پرینکا گاندھی نے کہا کہ یہاں زیادہ پیسے کی ضرورت ہے۔ ریاستی اور مرکزی حکومت کی وجہ سے یہاں پیسوں کی کمی ہے۔ ساتھ ہی انہوں نے کہا کہ وہ حکومت سے گزارش کریں گی کہ لوگوں کو درپیش تمام مسائل دور کی جائیں۔ رکن پارلیمنٹ نے اس حوالے سے مزید کہا کہ یہ ایسا مسئلہ ہے جس پر ہمیں دھیان دینے کی ضرورت ہے۔ اس کا حل آسان نہیں ہے لیکن جتنا ممکن ہوگا وہ حکومت پر دباؤ ڈالیں گی۔ وہ مزید کہتی ہیں کہ فنڈنگ میں اضافے کے ساتھ ساتھ بہتر نگرانی، سیکورٹی، فاریسٹ گارڈز اور چوکیداروں کی دستیابی پر بھی توجہ دینی ہوگی۔