ریاض:سعودی عرب میں وزارت حج وعمرہ نے کہا ہے کہ 104 ممالک کیلئے نسک پلیٹ فارم کے ذریعہ ڈائریکٹ حج پیکیجز کے رجسٹریشن کا آغاز اتوار سے ہوجائے گا۔رپورٹس کے مطابق وزارت حج وعمرہ کی جانب سے 104 ممالک کے شہریوں کیلئے نسک پلیٹ فارم کے ذریعہ براہ راست حج پیکجز بک کرنے کی سہولت فراہم کردی گئی ہے۔
وزارت کے مطابق جو ممالک اِس کیٹگری میں شامل ہیں اُن سے آنے والے عازمین کو حج پیکیج میں تمام خدمات فراہم کی جاتی ہیں جن میں فلائٹ بکنگ کے علاوہ دیگر تمام سروسز شامل ہیں۔
براہ راست حج پیکیج کی بکنگ کرانے والوں کو اپنی مرضی کے مطابق فلائٹ کا انتخاب کرنے کا اختیار ہوگا، اس کے علاوہ وہ اپنے افراد خاندان کیلئے بھی پیکیج حاصل کرسکتے ہیں۔ واضح رہے کہ سعودی عرب نے مقامی عازمین کیلئے بھی حج 1446 کی رجسٹریشن کھول دی ہے۔
وزارت حج و عمرہ نے مقامی عازمین بشمول شہریوں اور رہائشیوں کیلئے حج 1446 رجسٹریشن کھولنے کا اعلان کرتے ہوئے درخواست گزاروں سے درخواست کی ہے کہ وہ اپنی درخواستیں نسک ایپ یا سرکاری ای پورٹل کے ذریعہ جمع کرائیں۔ وزارت نے یہ بھی واضح کیا کہ جن لوگوں نے پہلے حج نہیں کیا ان کو ترجیح دی جائے گی۔
ہمیں فالو کریں
