ریاض ۔ نمائندہ اردو لیکس
سعودی عرب کی معروف تنظیم انڈین فرینڈس سرکل (آئی ایف سی) کی ادبی شاخ “ادبی فورم” کے زیر اہتمام جمعہ کی شام ایک شاندار شعری محفلِ بیاد ڈاکٹر تابشؔ مہدی مرحوم کا خیام رسٹورنٹ بنکویٹ ھال میں انعقاد عمل میں آیا۔ اس محفل کی صدارت ڈاکٹر انعام اللہ فلاحی نے کی جبکہ مہمانِ خصوصی اختر الاسلام صدیقی اور مہمانان اعزازی قیوم احمد، مشتاق شیخ، ضیاؔء عرشی۔ صدرِ ادبی فورم طاہر بلال بھی اسٹیج پر جلوہ افروز رہے ۔
محفل کا آغاز قاری جبریل بن جمیل کی تلاوتِ کلام پاک سے ہوا۔ جمیل احمد نے اپنی مترنم آواز میں ہدیئہ نعت پیش کرنے کی سعادت حاصل کی۔ادبی فورم کی روایت کے مطابق پہلے نثری نشست جس میں وسیم قریشی “اجالے تیرگی سے ڈر گئے ہیں” اور تنویر احمد تماپوری نے “ہنی مون ایکسپریس” کے عنوانات سے اپنی نثری تخلیقات پیش کیں جسے سامعین نے سراہا۔ ایک چھوٹے وقفہ کے بعد شعری نشست کا آغا عمل مین آیا۔ حسان عارفی نے فن نظامی کے جوہر بکھیرتے ہوئے خوبصورت انداز میں نظامت کی اور ابتداء تا آخر مشاعرہ کو دلچسپ بنایا بنائے رکھا۔
صدرِ محفل ڈاکٹر انعام اللہ فلاحی نے اپنے صدارتی کلمات مین کہا کہ ایک ایسے دور میں جب کہ لوگ اردو زبان و ادب سے دور ہو رہے ہیں ادبی فورم اپنی مسلسل محافل کے انعقاد سے زبان و ادب کی آبیاری میں اپنا بھرپور حصہ ادا کر رہاہے۔ ڈاکٹر انعام اللہ نے ادباء و شعراء کے کلام کی ستائش کی اور بڑی تعداد مین سامعین کی حاضری کی تعریف کرتے ہوئے منتظمین محفل کو مبارکباد پیش کی۔ مشاعرے میں جن شعراء حضرات نے کلام پیش کرکے داد و تحسین حاصل کی ان میں طاہر بلال، حسان عارفی، ضیا عرشی، جمیل احمد، سعید اختر آعظمی، افتخار راغب، مزمل تماپوری، اسماعیل روشن، عبدالرحمن راشد، سراج عالم زخمی، عبدالاول، سلیم کاوش، سہیل اقبال، ظفر محمود، دانش ممتاز، زکی قاضی اور قاضی منصور قاسمی شامل تھے۔
مشاعرہ مختلف مراحل طے کرتا ہوا اختتام کو پہنچا اور صدر ادبی فورم طاہر بلال کے کلمات تشکر کے ساتھ محفل اختتام پذیر ہوئی۔
