اتر پردیش کے مرزا پور میں ایک ویڈیو وائرل ہوئی ہے جس میں ایک خاتون کو آٹو ڈرائیور کو بے تحاشہ پیٹتے ہوئے دیکھا جا سکتا ہے۔ الزام ہے کہ یہ واقعہ آٹو کے کرائے کے تنازعہ کے بعد پیش آیا۔
تاہم، خاتون کا دعویٰ ہے کہ ڈرائیور نے ان کے خلاف نامناسب زبان استعمال کی، جس پر انہوں نے ردعمل ظاہر کیا۔ خاتون نے یہ بھی کہا کہ انہیں اس واقعے کے بعد سے دھمکی آمیز کالز موصول ہو رہی ہیں۔
ویڈیو میں پریانشی پانڈے آٹو ڈرائیور وملیش کمار شکلہ کو اس کی سیٹ سے گھسیٹنے اور گالی گلوچ کرتے ہوئے دکھائی دیتی ہیں۔ ڈرائیور کی منت سماجت کے باوجود وہ اسے مارتی رہیں
۔ یہ ویڈیو بعد میں خاتون نے اپنے انسٹاگرام پر اپلوڈ کی، جس کے وائرل ہونے کے بعد ڈرائیور نے پولیس میں شکایت درج کرائی اور انصاف کا مطالبہ کیا۔
آٹو ڈرائیور اور خاتون دونوں نے لڑائی کی وجہ پر مختلف دعوے کیے ہیں۔ ڈرائیور شکلہ کا کہنا ہے کہ جب انہوں نے کرایہ مانگا تو خاتون نے ان کے کالر سے پکڑ کر اپنی بہن کو موبائل دیا اور ویڈیو ریکارڈ کرنے کو کہا۔ انہوں نے مزید کہا کہ وہ کرایہ لینے سے بھی انکار کر چکے تھے اور انہیں چھوا تک نہیں تھا۔
شکلہ نے کہا کہ ویڈیو کے وائرل ہونے کے بعد انہیں بے عزتی کا سامنا کرنا پڑا اور وہ پولیس کے پاس انصاف کے لیے گئے۔ انہوں نے بتایا کہ ویڈیو نے انہیں بدنام کر دیا اور ان کے سینے پر چوٹ بھی لگی ہے۔
دوسری طرف، پریانشی پانڈے کے انسٹاگرام پر سینکڑوں پوسٹس اور ریلز موجود ہیں، جن میں ایک تصویر بندوق کے ساتھ بھی شامل ہے، اور ان کے 28,000 سے زیادہ فالوورز ہیں۔
انہوں نے ایک ویڈیو بیان میں کہا کہ ڈرائیور نے ان کے بارے میں غیر اخلاقی زبان استعمال کی، جس پر انہوں نے اس پر ہاتھ اٹھایا۔
پریانشی پانڈے کے انسٹاگرام اکاؤنٹ سے کئی ویڈیوز منظر عام پر آئی ہیں۔ دعویٰ کیا جا رہا ہے کہ لڑکی نے ریلز بنانے کے لیے ڈرائیور کو مارا تھا۔ حالانکہ ایف آئی آر درج ہونے کے باوجود اب تک گرفتاری نہیں ہو سکی ہے
بتایا گیا ہے کہ اس خاتون نے ویڈیو بنانے کے لئے آٹو ڈرائیور پر حملہ کیا ۔تاکہ اس ویڈیو کے ذریعے شہرت حاصل کی جاسکے۔ مرزا پور پولیس نے کیس درج کر کے تحقیقات شروع کر دی ہیں۔
