افریقی ملک چاڈ میں راشٹرپتی بھون پر بوکو حرام کا حملہ، اندھا دھند فائرنگ، جوابی کارروائی میں 18 دہشت گرد ہلاک

افریقی ملک چاڈ میں راشٹرپتی بھون پر دہشت گردوں کے ذریعہ خوفناک حملہ کیے جانے کی خبریں سامنے آ رہی ہیں۔ میڈیا رپورٹس کے مطابق یہ حملہ بوکو حرام نے کیا جس کے بعد سیکورٹی فورسز کی جوابی کارروائی ہوئی اور کم از کم 18 دہشت گرد ہلاک ہو گئے۔ اس تصادم میں ایک جوان کے شہید ہونے کی بھی اطلاع موصول ہو رہی ہے۔ دہشت گردوں کے ذریعہ کی گئی اندھا دھند فائرنگ اور سیکورٹی فورسز کی جوابی کارروائی میں تقریباً ایک درجن افراد زخمی بھی ہوئے ہیں جن میں سے کچھ کی حالت سنگین ہے۔

موصولہ خبروں کے مطابق سیکورٹی فورسز نے اس دہشت گردانہ کارروائی کا پوری ہمت کے ساتھ مقابلہ کیا اور حملہ آوروں کو موت کی نیند سلا دیا۔ الجزیرہ کی ایک رپورٹ میں بتایا گیا ہے کہ یہ حملہ چین کے وزیر خارجہ وانگ یی کی صدر محمد ادریس اور سرکردہ افسران سے چاڈ کی راجدھانی اینجامینا میں ہوئی ملاقات کے چند گھنٹے بعد ہوا۔ سیکورٹی فورسز کا کہنا ہے کہ انھوں نے راجدھانی اینجامینا میں راشٹرپتی بھون احاطہ پر حملہ کرنے والوں کو مقابلہ کیا اور انھیں پست کر دیا۔

ایک میڈیا رپورٹ میں چاڈ کے وزیر خارجہ اور حکومت کے ترجمان عبدالرحمن کلام اللہ کے حوالے سے کہا گیا ہے کہ حملہ آوروں میں 18 لوگ مار گئے ہیں اور 6 زخمی ہوئے ہیں۔ انھوں نے یہ بھی کہا کہ ہمارے ایک جوان کی بھی موت ہوئی ہے، جبکہ 3 زخمی ہوئے ہیں۔ ان میں سے ایک کی حالت سنگین ہے۔

اس فائرنگ واقعہ کے کچھ گھنٹوں بعد کلام اللہ ایک ویڈیو میں فوجیوں سے گھرے اور بندوق لیے ہوئے دکھائی دیے۔ انھوں نے اس موقع پر کہا کہ حالات پوری طرح سے قابو میں ہیں۔ عدم استحکام کی سازش کو ناکام کر دیا گیا ہے۔ کلام اللہ نے یہ بھی جانکاری دی کہ حملہ آور شراب اور ڈرگس کے نشہ میں تھے۔