'بی جے پی اور اے اے پی میں کوئی فرق نہیں ہے، آر ایس ایس ہےدونوں کی ماں ': اویسی

آئندہ اسمبلی انتخابات کو لے کر دہلی میں سیاسی درجہ حرارت بہت زیادہ ہے۔ دریں اثنا، اے آئی ایم آئی ایم کے صدر اور حیدرآباد کے رکن پارلیمنٹ اسد الدین اویسی نے ہفتہ کو اے اے پی اور بی جے پی پر حملہ کیا۔ عام آدمی پارٹی کا بی جے پی سے موازنہ کرتے ہوئے انہوں نے کہا کہ دونوں پارٹیاں نظریاتی طور پر متحد ہیں اور دونوں کا تعلق راشٹریہ سویم سیوک سنگھ سے ہے۔

نیوز پورٹل ’آج تک‘ پر شائع خبر کے مطابق میڈیا سے بات کرتے ہوئے اویسی نے بی جے پی اور عآپ  کو آر ایس ایس کی پیداوار قرار دیا۔ انہوں نے کہا کہ بی جے پی اور اے اے پی میں کوئی فرق نہیں ہے۔ دونوں کے نظریات ایک ہیں۔ آر ایس ایس دونوں کی ماں ہے۔ آر ایس ایس نے 1980 میں جن سنگھ اور بعد میں بی جے پی کی بنیاد رکھی اور دوسرے یعنی عآپ کی تشکیل  2012-13 میں  ہوئی  ۔انہوں نے کہا کہ  یہ ایک بہت بڑا ادارہ ہے، یہ ایک لیب میں بنایا گیا ہندوتوا ہے۔

ویسے دہلی اسمبلی انتخابات 2025 سے پہلے عام آدمی پارٹی، بی جے پی اور کانگریس کے درمیان لڑائی تیز ہوگئی ہے۔ تینوں جماعتیں ایک دوسرے پر کئی سنگین الزامات لگا رہی ہیں۔ دہلی میں فروری میں اسمبلی انتخابات ہونے ہیں اور انتخابات کی تاریخوں کا اعلان چند دنوں میں ہونے کی امید ہے۔ عام آدمی پارٹی نے آنے والے اسمبلی انتخابات کے لیے تمام 70 سیٹوں کے لیے امیدواروں کا اعلان کر دیا ہے۔

واضح رہے کہ 2020 کے اسمبلی انتخابات میں عام آدمی پارٹی نے 70 میں سے 62 سیٹیں جیتی تھیں۔ 2015 کے اسمبلی انتخابات میں عام آدمی پارٹی 70 میں سے 67 سیٹیں جیت کر مکمل اکثریت کے ساتھ دہلی میں برسراقتدار آئی تھی۔