[]
نئی دہلی: مدھیہ پردیش کے شہر اندور کو بھکاریوں سے پاک بنانے کے لیے حکام نے سخت اقدامات کا فیصلہ کیا ہے۔ ضلع انتظامیہ نے پہلے ہی بھیک مانگنے پر پابندی عائد کر رکھی تھی، اور اب بھیک مانگنے والوں کی مدد کرنے والوں کے خلاف بھی سخت قانونی کارروائی کا اعلان کیا گیا ہے۔ حکام نے کہا ہے کہ یکم جنوری 2025 سے جو شخص بھکاریوں کو بھیک دیتے ہوئے پکڑا جائے گا اس کے خلاف ایف آئی آر درج کی جائے گی۔
اندور کو بھکاریوں سے پاک کرنے کے اس اقدام کا مقصد شہر میں سماجی نظم و ضبط قائم رکھنا اور بھکاریوں کی حالت کو بہتر بنانا ہے۔ اس سلسلے میں دسمبر کے آخر تک عوام میں شعور بیداری مہم شروع کی جائے گی تاکہ لوگ اس مسئلے کے بارے میں آگاہ ہو سکیں۔ یکم جنوری سے یہ قوانین نافذ ہوں گے اور جو بھی شخص بھیک دینے کی کوشش کرے گا اس کے خلاف قانونی کارروائی کی جائے گی۔
اندور کے ضلع کلکٹر اشیش سنگھ نے کہا کہ بھیک مانگنے والوں کی مدد کرنے کی بجائے انہیں بازآباد کاری کے مراکز میں منتقل کیا جائے گا، جہاں انہیں زندگی بہتر بنانے کے مواقع فراہم کیے جائیں گے۔ ان کا کہنا تھا کہ بھیک دینے والے افراد شہر میں اس مسئلے کو مزید بڑھاوا دیتے ہیں اور اس سے نمٹنے کے لیے عوامی تعاون ضروری ہے۔
یہ اقدامات اندور کو نہ صرف بھکاریوں سے آزاد کرنے کے لیے کیے جا رہے ہیں بلکہ اس بات کو بھی یقینی بنانے کے لیے کہ بھکاریوں کو بہتر زندگی کے مواقع فراہم کیے جائیں اور وہ معاشرے میں شامل ہو سکیں۔
