حضرت سید شاہ گیسو دراز خسرو حسینی سجادہ نشین درگاہ بندہ نواز گلبرگہ کے جلوس جنازہ، نماز جنازہ وتدفین میں ہزاروں عوام کی شرکت

گلبرگہ 7نومبر:حضرت سید شاہ گیسو دراز خسرو حسینی صاحب سجادہ نشین درگاہ بندہ نوازؒ ایک ممتاز ماہر تعلیم اور صوفی تھے جن کا 6نومبر کی شب بعمر 80سال انتقال ہوگیا۔بروز جمعرات بتاریخ 7نومبر کو بعد نماز مغرب احاطہ درگاہ شریف حضرت خواجہ بندہ نوازؒ میں ان کی نماز جنازہ ادا کی گئی اور بعد ازاں تدفین احاطہ درگاہ شریف میں ہی عمل مں لائی گئی۔مسجد درگا شریف سے متصل مقام پرجانشین سجادہ نشین حضرت سید محمد علی الحسینی فرزند اکبر حضرت سید شاہ گیسو دراز خسرو حسینی صاحب و نے ہی اپنے والد بزرگوار کی نماز جنازہ پڑھائی۔ اس وقت ان کے براد ڈاکٹرسید مصطفی حسینی بھی ان کے ساتھ تھے۔

۔ وہ حضرت خواجہ بندہ نواز ؒ کے سلسلہ سے تعلق رکھنے والے 23ویں صوفی تھے۔ جب کہ حضرت خواجہ بندہ نواز کا چشتی صوفی سلسلہ میں ایک بڑا مقام رہا ہے۔ حضرت سید شاہ گیسو دراز خسرو حسینی نہ صرف روحانی سلسلہ کے لئے مشہور تھے بلکہ علم و دانشمندی کو فروغ دینے میں انھوں نے اپنی حیات میں بڑے کارنامے انجام دئے ہیں۔ انھوں نے خواجہ بندہ نواز یونویرسٹی کے چانسلر کی حیثیت سے خدمات انجام دیں۔علاقہ حیدر آباد کرناٹک میں دینی تعلیم کے دنیاوی تعلیم کو بھی فروغ دیا۔ اپنے آبا و اجدادکی طرح انھوں نے ہمیشہ روحانیت،تہذیب اور علمیت کو فروغ دینے میں نمایاں خدمات انجام دیں۔ ان کے انتقال سے ان کے چاہنے والوں اور معتقدین کے علاوہ صوفیانہ مسلک سے تعلق رکھنے والوں کا بڑا نقصان ہوا ہے۔

بروز جمعرات ۷نومبر کو حضرت سید شاہ گیسو درازخسرو حسینی کے انتقال پر ان کے وابستگان سے اظہار تعزیت کرنے والوں میں جناب عامر علی خان صاحب فرزند جناب زاہد علی خان صاحب چیف ایڈیٹر روزنامہ سیاست، جناب اکبر نظام الدین صاحب،جناب مفتی خلیل احمد صاحب، ڈاکٹر شرن پرکاش پاٹل وزیر میڈیکل ایجوکیشن کرناٹک، سید جعفر حسین ایڈیٹر صدائے حسینِی روز نامہ جناب الم پربھو پاٹل رکن اسمبلی گلبرگہ جنوبی،جناب رادھا کرشنا دوڈمنی رکن پارلیمینٹ گلبرگہ،ممتاز سماجی خدمت گزارجناب خلیل عفان ، ممتاز کانگریسی قائد جناب فراز الاسلام، جناب واحد علی فاتحہ خوانی،حیدر آباد سے رکن پارلیمینٹ جناب اسد الدین اویسی، سی ایم ابراہیم سابق وزیر کرناٹک، پریانک کھرگے ضلع انچارج وزیر گلبرگہ، اپو گوڑا پاٹل، سشیل نموشی صدر نشین ایچ کے ای سوسائیٹی و ارکان سوسائیٹی، شری شرن بسپا اپا مندر گلبرگہ کے گھر کے ارکان،ایس بی ایجوکیشن سوسائیٹی کے ارکان، جناب وہاب عندلیب سابق صدر کرناٹک اردو اکیڈمی،صدر انجمن ترقی اردو گلبرگہ ڈاکٹر اکرم نقاش و عہدہ داران انجمن ڈاکٹر ماجد داغی، شاہ نواز خان شاہین،اسد علی انصاری علاء الدین اکبرحیدر علی باغبان، کے علاوہ کے کئی ایک ذمہ داران نے بھی دیوڑھی شریف پرپہنچ کر حضرت سید شاہ گیسو دراز خسروحسینی صاحب کے پسماندگان اور ان کے معتقدین سے تعزیت کا اظہار کیا۔ خسرو حسینی صاحب کے چچا زادمصطفیٰ بابا، سید شاہ تقی اللہ حسینی براد سجادہ نشین و چیف ایڈیٹر روزنامہ کے بی این ٹائیمس، چھوٹی درگاہ کے سجادہ حضرت حسن شبیر حسینی،حضرت شیخ افضل الدین جنیدی سجادہ نشین شیخ روضہکے علاوہ ہزاروں کی تعداد میں لوگ جلوس جنازہ، نماز جنازہ و تدفین کے وقت شریک تھے۔ پولیس کے عملہ نے حضرت سجادہ نشین کے اعزاز میں ہوائی فائیرنگ کرتے ہوئے گارڈ آف آنر بھی پیش کیا۔