’مطالبات پورے نہیں ہوئے تو لوک سبھا انتخاب کے دوران بھی تحریک جاری رکھیں گے‘، کسان لیڈروں کا اعلان

آج دہلی کے رام لیلا میدان میں منعقد ’کسان مزدور مہاپنچایت‘ میں کئی خاتون کسان بھی موجود تھیں، جنھوں نے مرکزی حکومت کے خلاف نعرے بھی بلند کیے۔ مہاپنچایت میں پنجاب، ہریانہ، اتر پردیش، راجستھان، مہاراشٹر، ہماچل پردیش اور مغربی بنگال جیسی ریاستوں سے بڑی تعداد میں کسان پہنچے تھے۔ کسانوں کی مہاپنچایت بہتر انداز سے چلے، اس کے لیے دہلی پولیس نے وسیع انتظامات کیے تھے۔ انھوں نے مسافروں کو وسطی دہلی کی طرف جانے والی سڑکوں سے بچنے کے لیے ٹریفک ایڈوائزری پہلے ہی جاری کر دی تھی۔ پولیس نے کسانوں کو اس مہاپنچایت کی اجازت اس شرط پر دی تھی کہ 5000 سے زیادہ لوگ اکٹھے نہ ہوں، لیکن تقریباً 10 ہزار کسان مظاہرے والی جگہ پر پہنچنے میں کامیاب ہو گئے۔