[]
ریاض: حرمین شریفین انتظامیہ نے عازمین عمرہ کو بڑی خوشخبری سنادی، انتظامیہ کا کہنا ہے کہ مطاف عمرہ زائرین کے لیے خاص ہوگا۔ غیر ملکی ذرائع ابلاغ کے مطابق حرمین شریفین انتظامیہ نے کہا ہے کہ صرف طواف کرنے والے زائرین بالائی منزلوں سے کعبہ کا طواف کرسکتے ہیں۔
حرمین انتظامیہ کے مطابق زائرین کی سلامتی اور مناسک کی آسانی کے ساتھ ادائیگی کے لیے مطاف کو عمرہ زائرین کے لیے مختص کیا گیا ہے۔ انتظامیہ کا مزید کہنا ہے کہ مطاف میں صرف طواف ہوگا، نماز پڑھنے والوں کو چاہئے کہ وہ مختلف مصلوں (مطاف کے باہر) میں جاکر نمازیں ادا کریں، یعنی وہ افراد جنہوں نے احرام نہیں پہنا ہوگا انہیں مطاف کے علاقے میں داخل نہیں ہونے دیا جائے گا۔
دوسری جانب سعودی وزارت حج و عمرہ نے دوٹوک کہا ہے کہ مملکت میں مقیم تارکین وطن کا اجازت نامے کے بغیر حج کرنا غیرقانونی ہے۔ سعودی وزارت حج وعمرہ نے مملکت میں مقیم تارکین وطن کو خبردار کیا ہے کہ ضروری اجازت نامے کے بغیر حج کی ادائیگی غیرقانونی ہے جبکہ اس کی خلاف ورزی پر بھاری سزا کا سامنا کرنا ہوگا۔
سعودی وزارت کا کہنا ہے خلاف ورزی پر 50 ہزار سعودی ریال جرمانہ عائد کیا جائے گا اور خلاف ورزی کرنیوالے تارکین وطن کو 6 ماہ جیل کی سزا ہوگی۔ سعودی وزارت حج و عمرہ کے مطابق بغیر اجازت حج کرنے والے تارکین وطن کے 10 سال تک ملک میں داخلے پر بھی پابندی ہوگی۔
ہمیں فالو کریں
