[]
بھوپال: نشہ میں دھت ٹیچراسکول پہنچ گیا، بچوں نے ویڈیو بناکر سوشل میڈیا پر شیئر کردی۔ میڈیا رپورٹس کے مطابق مدھیہ پردیش کے شہر جبل پور میں سرکاری اسکول ٹیچر کو اسکول کے احاطہ میں مبینہ طورپر نشہ کی حالت میں داخل ہونے پر حکام نے معطل کردیا۔
ٹیچر کی شناخت راجندر نیتم کے نام سے ہوئی ہے جو نشہ کی حالت میں اسکول پہنچا تو طلبا نے اس کی ویڈیو بنالی جو سوشل میڈیا پر وائرل ہوگئی۔ ویڈیو میں پرائمری اسکول کے ٹیچر نیتم کو نشہ میں دھت ہوکر اِدھر اُدھر گرتے دیکھا جاسکتا ہے جسے دیکھ کر طلبا بھی حیران رہ گئے۔
عینی شاہدین کا بتانا ہے کہ نیتم اس قدر نشہ میں تھا کہ وہ گندے الفاظ بک رہا تھا اور کھڑے ہونے کے قابل بھی نہیں تھا ، جب ویڈیو بنائی گئی وہ تقریباً بیہوش تھا۔ رپورٹ کے مطابق نیتم ماضی میں اسی طرح نشہ میں دھت ہوکر اسکول پہنچ چکا ہے جس کی وجہ سے کئی طلبا اسکول بھی چھوڑ چکے ہیں۔
مقامی لوگوں نے دعویٰ کیا ہےکہ جمونیہ گورنمنٹ پرائمری اسکول میں تعینات ہونے کے بعد ٹیچر ہمیشہ نشہ کی حالت میں اسکول آتا تھا اور ٹھوکر کھاکر گر جاتا تھا۔ محکمہ تعلیم کو پہلے بھی اس کے خلاف کئی شکایات موصول ہوئی تھی تاہم کوئی کارروائی نہیں کی گئی تھی۔ سوشل میڈیا پر ویڈیو وائرل ہونے کے بعد حکام اور محکمہ تعلیم نے نوٹس لیتے ہوئے نیتم کو معطل کردیا گیا۔
ہمیں فالو کریں
