’یہ ہمیں اچھوت سمجھتے ہیں، ہم برابر میں بیٹھ گئے تو ان کے کپڑے گندے ہو گئے‘، ہیمنت سورین کا بی جے پی پر تلخ تبصرہ

ہیمنت سورین نے بی جے پی پر حملہ کرتے ہوئے کہا کہ ’’وہ کہتے ہیں ہم جنگل میں تھے اور ہمیں جنگل میں ہی رہنا چاہیے۔ یہ ہمیں اچھوت سمجھتے ہیں۔ ہم برابر میں آ گئے تو ان کے کپڑے گندے ہو گئے۔ ان کو میرے ہوائی جہاز میں پرواز کرنے سے دقت ہے، میرے 5 اسٹار ہوٹل میں رہنے سے دقت ہے، میرے BMW میں سفر کرنے سے دقت ہے۔‘‘ انہوں نے مزید کہا کہ ’’مجھے اس کا احساس تھا، ہم نے ہار نہیں مانی ہے۔ مجھے جیل کی سلاخوں کے پیچھے قید کر کے یہ اپنے منصوبوں میں کامیاب نہیں ہو پائیں گے۔ مجھے معلوم تھا کہ وہ میری مدتِ کار میں بھی رکاوٹیں کھڑی کریں گے۔ ہماری معدنی دولت پر ان کی نظر گدھ کی مانند ہے۔ صرف جھارکھنڈ میں ہی نہیں بلکہ پورے ملک میں قبائلی محفوظ نہیں ہیں۔‘‘